BIS phal chin bak iron rod zawrh khap a ni

Food Civil Supplies and Consumer Affairs (FCSCA) secretary Teresy Vanlalhruaii chuan nimin khan thuchhuah siamin, Mizorama iron rod zawrh leh hralh tur atan BIS standard size chauh phal a nih thu a tarlang a; dan bawhchhiate chu BIS Act 2016 leh CrPC Act 1973 hmanga hrem an ni ang.

FCS&CA Secretary tarlan danin, Mizorama iron rod zawrh leh hralh tur atan BIS standard size - 4mm, 5mm, 6mm, 8mm, 10mm, 12mm, 16mm, 20mm, 25mm, 28mm, 32mm, 36mm leh 40mm chauh phal a ni a, size dang chu a siamtu leh a hmangtute inremna hmang chauha siam phal a ni. Standard iron bar-te hi a size mila a rihna tur bituk huam chhungah chauh siam tur a ni.

High strength deformed steel /iron rods siam tur hian phalna (compulsory certification) neih a ngai a, a standard phalsak ang chauhin BIS licence neitu chuan a siam thei ang. Iron rod hralh dawnah bûk tur a ni a, bûkna atan hian Legal Metrology Wing-in an endik electronic weighing machine chauh hman tur a ni.

Ṭul bik thilah customer-in a BIS standard size ang ni lo, size dang a mamawh a nih chuan BIS in a certify ngei siamchhuaktu leh customer inkarah iron rod mamawh zat leh a hmanna tur ziakin inremna an siam tur a ni.