Millennium Centre-ah Edu-Fest-2023 buatsaih

Zalen chanchinbu leh Lynchpin ṭangkawp chuan nimin khan Millennium Centre chungzawlah Edu-Fest-2023 an buatsaih a, Higher & Technical Education (HTE) minister Dr R Lalthangliana'n a hawng. Minister chuan, "Mizote zingah qualification nei an tam hle a, quality ṭha tak tak nei chhuah a hun tawh tak zet," a ti.

Dr R Lalthangliana chuan, qualification aiin quality a pawimawh zawk tih a sawi a, "Mizote zingah qualification nei an tam hle a, quality ṭha tak tak nei chhuah a hun tawh tak zet. Zirlaite zingah technical line luhchilh an tlem sawt hle a, he lamah hian zirlaite'n ṭan in lak thar leh angai a ni," a ti.

Mizoramin Oncologist leh Nephrologist a tlakchham thu sawiin Minister chuan, "ZMC-a hnathawk tam zawk hi state-pawnlam mi an ni a, Mizoram State Super Specialty Cancer and Research Centre (MSSSCRC) peihfel a nih hunah Mizo thawk tur hmuhzawh loh a hlauhawm," a ti a, zirlaite chu theihtawp chhuah turin a fuih.

HTE Minister chuan zirlaite hmakhua ngaia Edu-Fest buatsaih a ni chu lawmawm a tih thu a sawi a, "Zirlaite hi hnam rohlu, nakina ram hruaitu tur an ni a, theihtawpa anmahni ṭanpui a pawimawh hle a ni," a ti a, zirlaite chu sorkar hnaah innghat loa, mahni thiamna hmanga dinchhuah tum turin a chah.

Edu-fest 2023 hawnna inkhawm hi Zalen editor Vanlalrema Vantawl-in a kaihruai a, MJA treasurer C Lalhmachhuana pawhin thu a sawi.

Fest-ah hian Mizoram pawn aṭangin Parul University, Vadodara, Gujarat; Graphic Era University, Dehradun, Uttarakhand; Amity University, Kolkata; SRM University, Delhi; Girijananda Chowdhury University, Guwahati, Assam; Vijaybhoomi University, Karjat, Maharashtra; Sharda University, Greater Noida, Uttar Pradesh; Ramaiah University of Applied Sciences, Bengaluru; Global Reach; Indian Army, Indian Air force leh student loan pe ṭhin Yes Bank aiawhte an tel a ni.