National Florence Nightingale Award dawngtute chawimawi

Nimin kha International Nurses Day a ni a, he ni pual hian Health & Family Welfare (HFW) minister Dr R Lalthangliana hoin a pisaah kum 2020-21 chhunga Mizo zinga National Florence Nightingale Award dawng mi pathumte chawimawina hun hman a ni. Mizoramah National Florence Nightingale Award dawng thei nurse 14 an awm tawh.

Chawimawina inkhawm hi HFW principal secretary Esther Lalruatkimi'n a kaihruai a; minister Dr R Lalthangliana chuan, Mizo zinga National Florence Nightingale Award dawng an awm ṭhin chu ropui a tih thu a sawi a, "Nurse hna thawk mekte leh pension tawh te, medical lama thawkte hian an hna pawimawh zia hriain, damlo leh chan chhe zawkte hmangaihna, duhsakna leh khawngaihna tak tak nen an enkawl zel a ngai," a ti a, hriselna ngaih pawimawh a ṭul thu a sawi.

Nurse hnathawk ṭhate chawimawina 'National Florence Nightingale Award' hi kum 1973 aṭanga kalpui ṭan a ni a; kum 2020 khan C Dengthangpui, health supervisor (rtd) leh Vanlalṭhuami, health worker-te'n an dawng a, kum 2021 khan Vanlalrovi, GNM staff nurse in a dawng bawk. Award dawngtute hi chawimawina certificate leh pawisa pek an ni.