Ex-MNA in ruhro an phawrh

MNF chuan thuchhuah siamin, Ex-Mizo National Army-te hmalaknain nimin khan hnam pasalṭha captain Chhunhranga, Lawngtlai ruang chu a chhungte ngenna angin Martarte Thlanmuala dah tura phawrh a nih thu an tarlang.

Ruhro hi an phumna aṭanga lak chhuah a nih hnuah Hnam Rûn, Lawngtlaiah a thlahna hun hman a ni. Captain Chhunhranga hi MNV, Phawngpui area-a awm ṭhin a ni a, January 1968 khan Arakan aṭanga an lo haw chho chu Vahai khawdai ramhnuaiah vai sipaite nen intawng fuhin an kaphlum a, a boral hian kum 25 mi a ni.