Ram siamṭha turin Congress party-ah mi ṭha tak tak an lokal dawn - Lasawta

MPCC chuan nimin khan Congress Bhavan-ah political session an hmang a, MPCC presidentt Lalsawta chuan Congress party-ah mi ṭha tak tak an luh dawn thu a sawi.

Lalsawta chuan mirethei leh tlachhamte dinhmun siamṭha tura an tana thawh chu an mawhphurhna leh an bat a nih thu sawiin, "Hun lo la awm tura kan thlahte khawvel buatsaih sak hi kan bat a ni a, a ṭha thei ang berin ram kan kaihhruai tur a ni. Kan theih bak Pathianin a phût lo a, kan theih bakah chuan Pathianin min pui ṭhin. Dik taka kan tih zel chuan mal min sawm zel dawn," a ti.

MPCC President chuan an hma lama êng awm chu huaisen leh dik taka pan zel tura an party mite chahin, "Ram siam turin Congress party-ah mi ṭha tak tak an lo kal dawn. Kan lama rilru siam fel tawh, khelh fuh leh bawh fuh tum ve lo an lokal dawn," a ti a, an party zawm thar turte nen Mizoramah danglamna an thlen tir dawn thu a sawi.

Kalphung thar chu a sawia sawi a ni lo, a tiha tih a nih thu sawiin Lalsawta chuan, "Party pakhat chuan inthlana sum petute pawisa la ula, vote lo rawh u, an ti. Congress chuan la lo ula, vote lo bawk rawh u, kan ti a ni. Hei hi kohhran leh Election Commission of India duh dan a ni. Min ṭanpuitu chu sum ni loin Pathian a ni," a ti.

MPCC President chuan CADC inthlanah mite'n 'Congress chu in artelukawn ang' tia an sawi thu sawiin, "Sum tiamkam leh pek tur nei ve lo chungin seat li Pathianin min pe. Congress hmasawnna result-ah kan hmu. Karnataka-ah sorkar turin Congress Party a inbuatsaih," a ti a, a ni telin Congress hmasawnna India ram pumah a thleng leh mek niin a sawi.