Zo hnahthlak unaute kan thlahthlam thei lo - Dy. Chief Minister

MNF chuan nimin khan an pisa-ah chhung inkhawm an hmang a, thusawitu MNF sr. vice president Tawnluia, dy. chief minister chuan Zo hnahthlak unaute an thlahthlam theih loh thu a sawi.

Tawnluia chuan Burma lama Chin unauten chaw an nghei tur a ni lo tiin central-in a remti lo chung ṭanpuina pek an nih thu sawiin, "Naupangte tan sikul kalna thlengin kan lo buaipui. Bangladesh aṭangin Zo hnahthlakte rawn luh an tum leh BSF in an lo dang tlat a, kan unaute an ni e, tiin kawng dangin an lo luh dan kan dap ngar ngar a ni," a ti.

Manipur-ah Zo hnahthlakte raltlanin an awm leh tih sawiin Dy. CM chuan, "Meitei hoin kan ram luahlan an tum a, kan CM-in Union Home Minster-te biain, kan Home Minister pawhin biak theih ang ang a bia a ni. Manipur CM chuan kan CM chu lo be duh loin phone call pawh a la duh lo ṭhak," a ti a, a theih dan danin hma an lak thu a sawi.

Tawnluia chuan Mizoram CM-in Lamka, Manipur-ah Dr L Thangmawia, MLA kal tirin, huaisen takin an ei leh in tur a han pe tih sawiin, "Zo hnahthlak unau zawng zawngte hi kan thlahthlam thei lo. Nationalism-ah hian kan intuai thar leh zual a ngai. Kalphung thar ti hian an sawi ve em, keini chuan nationalism kan hmachhuan a ni," a ti.

MNF Sr. Vice President chuan CADC inthlan chungchang sawiin, "Pathian hruainain CADC-ah chakna min pe hi a lawmawm a, lawmthu i sawi mawlh mawlh ang u. Hman ni lawkah LC by-election ah kan chak loa, kan khingpuite an phur hle," a ti a, an chak lohna chu an chaknaah pawmin hlawhtlinna an hmuh tâk thu a sawi.