Central-in Mizoram dilna a la pawm loh vangin Mizoramah lungalhthei la zawng ṭan thei lo
Mizorama lungalhthei (coal) zawnna tur tender chhuah dilna Mizoram sorkarin kum 2021 leh 2022-a sorkar laipuia a thlen chu pawm a la ni lo. Lungalhthei hi Lunglei district-a West Rotlang ram leh Mamit district-a Thinghlun ramah zawn tum a ni.
Vanglaini palai zawhna chhangin Geology & Mining hotute chuan, tender chhuah dilna sorkar laipuia Central Mine Planning & Design Institute Ltd (CMPDIL) hnenah pawmpui tura an thlen chu chhanna an la dawn loh thu an sawi a, "December 2021 khan CMPDIL hnenah tender terms & condition kan thawn tawh a, kan hmu lo an tih avangin email leh hard copy-in May 2022 khan a kaihhnawih officer pathum hnenah kan thawn nawn leh a, tun thlengin approval min la pe rih lo," an ti a, reminder thawn leh an tum thu an sawi.
Tarlan tawh angin, Geology & Mining hian lungalhthei zawnna tura tender chhuah phalna an neih hunah Mizorama lungalhthei zawngtu tur an zawng dawn a, company-te'n leilung an zirchian hnuah laih chhuah tur khawpa tam a awm chuan lungalhthei lai chhuaktu tur zawnna auction neih leh tur a ni.
September 10, 2022-a Hyderabad-a National Mines Ministers' Conference-a Commerce & Industries minister Dr R Lalthangliana sawi danin, Mizorama hmun pahnih - Mamit district-a Thinghlun ram sq.km 33-a zauah leh Lunglei district-a West Rotlang ram sq.km. 48-a zauah lungalhthei zawn tum a ni.
Lungalhthei zawn hna hi company-te thawh tur niin, sum sèn ngai zawng zawng sorkar laipui tum tur a ni a; Mizoram sorkara Directorate of Geology & Mining leh Commerce & Industries dept chu nodal department an ni ang a, logistic support ngai zawng zawng an buaipui dawn a ni.