KHAWTHLIR

CEO thar

Mizoram chuan hun eng emaw chen chief electoral officer (CEO) a neih loh hnuah Election Commission of India chuan Mizoram CEO atan Madhup Vyas, IAS a ruat. April, 2022-a Mizoram CEO P Jawahar sawn a nih hnuah Mizoram hian CEO a nei lo char char a ni.

Thisen pe

May 13, Inrinni khan KṬP, Dinthar Branch chuan an kohhran hall-ah Synod Hospital tan thisen unit 53 an pe a, petute mipa 49 leh hmeichhia pali an ni. YMA, Falkawn Branch pawhin ZMC blood bank tan thisen unit 48 an pe a, petute mipa 41 hmeichhia pasarih an ni.

Oxygen pe

AMC Ward No. XVIII corporator Malsawmzuala Ralte chuan May 13, Inrinni khan Formosa Foundation India kaltlangin a ward chhunga YMA branch 10-te hnenah oxygen concentrator a hlan a, an ward huam chhunga awm City Hospital Mission Veng hnenah ventilator leh oximeter a hlan bawk. Oxygen concentrator leh ventilator sem chhuah hi Israel leh USA siam niin Rs 13,90,000 man a ni.

Minister-in tlawh

Animal & Husbandry & Veterinary minister Lalrinawma chuan May 13, Inrinni khan Republic Venga AH&Vety department complex a tlawh. Minister chuan department ram enkawltute chu midang tana hnawksak loa mipui rawngbawltu an nihna inhre reng tur leh mahni hnathawhna zawnah ṭheuh midang tan malsawmna nih tum turin a fuih a; hmun awl remchangah thingphun belh tura hmalak ni se a duh thu a sawi.

Curfew pawtsei

Chawngte sub-divisional magistrate Lalneihthanga Colney chuan Chakma Autonomous District Council (CADC)-a Rengkashya bialah zan dar 7 aṭanga zing dar 4 inkara pawn chhuah khapna (curfew) a lo puan tawh chu May 20, 2023 thleng a pawtsei a, curfew hian dan leh thupek kengkawhtu leh magistrate-in phalna a pekte a huam lo ang. Thupek bawhchhiate chu IPC Section 188 hmanga hrem tur an ni.