Manipur buaina avanga hliam tuar Aizawlah rawn phurh thlen a ni
Manipur buaina avanga hliam tuar Pauginmuan (25) chu nimin khan enkawl turin Civil Hospital, Aizawl rawn phurh thlen a ni a, MLA pahnih Dr ZR Thiamsanga leh Dr L Thangmawiaten hospital-ah hian an lo hmuak.
Mizo National Youth Front (MNYF) chuan thuchhuah siamin, Manipur buaina avanga hliam tuarte tan chief minister Zoramthanga'n theihtawp a chhuah zel tih tarlangin, "A hmalakna kal zelah Pathianni (nimin) zing khan silaimu avanga hliam tuar pakhat chu Aizawl rawn thlenpui niin Civil Hospital, Aizawlah enkawl zui tura dah luh nghal a ni," an ti.
MNYF tarlan danin, Pauginmuana hi Manipur-a buaina chhuah ṭan ni, May 3, 2023 thim hnu khan Thengra Leirak-a inkahnaah telin silaimu a dawng a, silaimu 17 a taksaah lutin, Churachandpur District Hospital-ah silaimu pali lakchhuah a ni tawh.
A taksa-a silaimu awmna ṭhenkhat hi a vascular vein bul maiahte a nih avangin an hmanraw neih hmanga zai an ngam tawh lo a, Aizawlah an rawn refer ta a ni.
Manipur buaina avanga hliampui tuarte tan CM Zoramthanga'n theihtawp a chhuahna avangin motor-a phurh sawn ngam tawh loh hliamna zual mi pali - Paukhanhual, Diamond Thang, Hatkhanhoih leh James Nangminlun-te Churachandpur aṭangin Guwahati-ah Army Helicopter-in tun kar tir khan phurh thlak an nih thu pawh MNYF chuan an tarlang.
MNYF chuan, hriat theih chinah Manipur-a Zo hnahthlak 50 chuang thi tawhin, Pathian biak-in 60 chuang hal a ni tawh tih tarlangin, "Imphal-a Zofate in leh lo tam tak hal chhiat niin, Zofate khua tam tak hal a ni tawh. Hetianga dan palzuta, tam zawkna hmachhuana Zofate sawisa tute hi kan dem tak zet a, kan unaute tan a tawp thlengin kan ṭang tlat dawn," a ti.
Myanmar leh Bangladesh-a kan unaute chunga thleng leh tuna Manipur-a kan unaute hnena thleng mek hi Pathianin Zofate rorelna pakhat hnuaia min dahna tur kalkawng a nih an rin tlat thu tarlangin MNYF chuan, "Buaina avanga nunna chan ta chhungte kan tawrhpui tak zet a, hliam tuar zawng zawngte damchhuak leh thuai turin duhsakna kan hlan," an ti a, Zoram mipui leh kohhrante ṭawngṭai chhunzawm zel turin an sawm.