MLA-in chhungkaw 61 hnenah tuizem a pe

Mamit bialtu MLA H Lalzirliana chuan May 13, Inrinni khan a bial chhunga Lengte leh Nghalchawm khua a tlawh a; Lengte khuaa chhungkaw 30 leh Nghalchawm khuaa chhungkaw 31 hnenah tui dahkhawlna plastic tuizem a pe.

H Lalzirliana chuan harsatna hrang hrang karah pawh Mizoram tana hriatreng tlâk, hmasawnna ruhrel lian tak tak din a nih thu a sawi a, "Infiammi, zirlaite leh kut hnathawktute tan rahbi thar pawimawh tak tak sorkarin a buatsaih nasa hle a, rahbi thar thil tam takah kan chuangkai a ni," a ti.

Ram leh hnam tana sorkarin theihtawp a chhuahnaah hian mipuite duhkhawp lohna leh tlin tâwk lohna pawh an neiin a rinawm tih sawiin Mamit Bialtu MLA chuan, "Chûng ang thilte chu a sorkar ang pawhin kan pawm em em," a ti a, Pathian ṭanpuina leh ram mipuite'n sorkar an thawhhopuina a zarah hmalam hun êng tak an neih zel dawn thu a sawi.

H Lalzirliana chuan, sorkarna an chelh chhungin harsatna tam tak an tâwk tih a sawi a, "Hun rei tak hripuiin min tihbuai bakah ramri buai kan tawng chho leh a ni. Ran hri lengin min tihbuai leh hnuin ṭhenawm ram hrang hrang aṭangin kan unau raltlante buaipui a lo ngai leh a, harsatna hrang hrang karah sorkar chuan theihtawp a chhuah takzet. Ei leh bar, ni tin khawsakna kawngah pawh harsatna nasa lutuk tawk loin kan inkhai chhuak thei. Sorkarin ram mipuite tana a hmalakna hmuh hmaih chi a ni lo a, hriatreng a nih tawh ang," a ti.