Serchhip district-a lirthei chuan man ennawn

Serchhip district-a lirthei chuan man en­nawntu committee chu an chairman HD Lalpek­mawia, district bawrhsap hoin tunhnai khan an ṭhukhawm a, State Transport Authority-in ruahmanna a siam angin passenger phur sumdawng lirtheite chuan man (passenger fare) an ennawn.

HD Lalpekmawia chuan, lirthei khalha eizawngtute chu mipuite mamawh hnathawktu rawngbawltu pawimawh tak an nih thu a sawi a, "Chutihrualin a chuan man lamah ṭhahnem kan ngai lutuk ang a, mipuite tan phurrit kan ni ang tih a hlauhawm ve bawk. Chuvang chuan lirtheia eizawngtute leh min hmangtu mipuite tana chhe lo ve ve tura ruahmanna kan siam thiam a pawimawh hle a," a ti.

Taxi ṭhenkhat uchuak deuh taka chuan man la ṭhin an awm nia a hriat thu sawiin Serchhip DC chuan, hetianga mipuite chunga fel lo taka thil tih hi awm lo se a duh thu a sawi.

Serchhip Auto Rick­shaw Owner Association chuan an tlan chhuah km. hmasa bera Rs 30 an hman lai chu Rs. 40-a tihsan an rawt a, a dawtleh km. rate awmsa (subsequent kilometers rate) Rs 20 erawh a la chhe loah an ngai.

Taxi Owner Asso­ciation chuan tuna sorkar rate ding mek, kum 2021-a siam aia tlawma an tlan mek thu an sawi a; Maxi Cab lamten rate hmanlai metalled road km. khat zela Rs. 3 leh unmettaled road-ah Rs. 3.50 chu metal-ah Rs. 4 leh unmetal-ah Rs. 4.50 ni se an duh thu an sawi. Bus neitute chuan rate an hman lai km khata Rs. 2 chu Rs. 4-ah tihsan an rawt bawk.

Rawtnate hi State Transport Authority-ah thehluh a ni dawn a; taxi leh auto rickshaw permit chungchang sawiho nghal niin, tun dinhmunah chuan rickshaw leh taxi-te hi an indaih rih nia an hriat thu an sawi.

District Transport Office chhin­chhiah danin Serchhip district-ah hian auto rickshaw permit 535 leh taxi permit 184 a awm mek a ni.