Congress party-in an tho chhuak leh mekah an inngai

Mizoram Pradesh Congress Committee (MPCC) chuan thuchhuah siamin, Karnataka state-a Congress party an chak chuan India ramah Congress party a tho chhuak leh mek tih a lantir niin an tarlang.

MPCC chuan, Karnataka state inthlanah BJP sorkar hneh taka paihthlak a ni tih sawiin, "India ramah Congress party a tho leh mek tih lantirtu a ni. Karnataka inthlanpuia Congress party-in hnehna a chan theih nachhan chu India rama sakhaw zalenna duhtu mipui tam takin Congress party-ah beiseina thar an neih mek vang a ni," an ti.

Congress party chuan, Karnataka inthlan result chu central-ah Congress party tluchhe mek leh tho leh tur awm tawh lo ang hiala sawi ṭhintu MNF leh ZPM party hotute thusawiin belhchian a dâwl lohzia lantirtu a ni tih hre turin Mizoram mipui an chah a ni.

Mizoramah pawh Lalsawta kaihhruai Congress party-in hmasawn lam a pan zel nia sawiin MPCC chuan, "CADC inthlanah beiseina sang lo tak karah seat pali kan chang thei a; Central-a rorel lai BJP leh Mizorama rorel mektu MNF-ten sum leh pai tam tak nena thapui an thawh chunga Congress party candidate pali an tling thei hi hmasawnna nasa tak a ni," an ti.

MPCC chuan, India ram state hrang hrangah BJP ninna thlipui a tleh mek laiin, Congress party leh a thawhpui theih tur party-te'n boruak ṭha tak an siam mek niin an sawi bawk.