Serchhipah vawk leh vawksa aṭanga thil siam lakluh khap

Serchhip district magistrate HD Lalpekmawia chuan May 13, Inrinni khan Serchhip district-ah ram dang (foreign) aṭanga vawk, vawksa leh vawksa aṭanga siam eitur lakluh khap a nih thu a puang a, thupek hian thuleh awm hma chu thla hnih chhung a huam ang.

District Magistrate chuan, Champhai district chhung hmun ṭhenkhatah vawk pûl hri, African Swine Fever (ASF) a lèn mek avang leh Serchhip khaw chhungah ran natna Porcine Reproductive & Respiratory Syndrome (PRRS) nia rinhlelh vawk damlo a awm mek tih a tarlang a, "Serchhip district-ah ram dang (foreign) aṭanga vawk, vawksa leh vawksa aṭanga siam eitur lakluh khap tlat a ni," a ti.

MIPUITE HRIATTUR

1. ASF hri lènna hmun - Champhai district aṭangin vawk, vawksa leh vawksa aṭanga siam eitur reng reng lakluh khap tlat a ni.

2. State pawn aṭanga vawk lalut turte chuan Agricultural and Processed Food Product Export Development Authority (APEDA) approved firm aṭang chuahin an lalut thei ang. Lalut turte hian AH&Vety Director phalna an la hmasa ngei tur a ni.

3. Serchhip khaw chhung aṭangin vawk, vawksa leh vawksa aṭanga siam eitur reng reng thawn chhuah khap tlat a ni.

4. Vawk hrisel ṭha chauh talh tur a ni a, vawk damlo reng reng talh tura sawngbawl loh tur.

5. Vawk damlo leh thi reng reng chu AH&Vety department thawktute hnenah hriattir vat tur.

6. Vawk thi reng reng thûk taka phum bo tur a ni.

7. Vawk in leh a velte disinfectant - bleeching, chinai, sodium hypochloride etc. hmanga tihfai ṭhin tur.

8. Ran in intlawhpawh tawn loh tur a ni.

9. Thupek zawm lo chu IPC Section 188 hmanga hrem an ni ang.