Dawt sawi anga puh ka nihna chhan chu thawktute nikhua loh vang - Dr K Pachhunga

Luglei South bialtu MLA Dr K Pachhunga chuan May 13, Inrinni khan Lunglei Circuit House-ah thuthar thehdarhtute kawmin, District Ayush Hospital, Theiriata din a nih theihna tura a hmalaknaah dawt sawi anga amah puhna awm chu thawktute nikhua loh vang a nih thu a sawi.

Dr K Pachhunga chuan central sorkar duhdanin district tinah Ayush hospital din tum a nih thu a sawi a, " Lunglei district pawhin kan neih vat theihna turin Health Minister leh department hotute ka sawipui. Ram a thlawna pek a ṭul a, Theiriat VC ten phal takin an ram an pe. Chungte nen chuan department-ah thehluh leh niin, department chuan first phase an buaipui mek thu te, 2nd phase an buaipui leh tur thute leh chutah chuan in tel ngei kan ring e tiin min chhang," a ti.

Department-in an chhanna hi Ṭawipuiah a sawi chhuah thu sawiin Dr K Pachhunga chuan, "Chanchintharah pawh puan a ni. RTI hmangtea dil niin, RTI chhangtu khan file keu loin, chutiang hmalakna a awm lo tiin an lo chhang ta si. Chuvang chuan news thehdarhtute leh opposition-te pawhin remchangah lain 'Pu Pachhunga’n dawt a sawi' tih ang tiat deuhin a kal ta a ni," a ti a, dawt sawi anga a lan chhan chu thawktute nikhua loh vang a nih thu a sawi.

Thuthar thehdarhtute zawhna chhangin Lunglei South Bialtu MLA chuan, "RTI chhan­na dik lo pe­chhuaktu hrem a nih theihna turin comp­laint thehluh a ṭhat ka ring. Mahni hna ngaih­pawimawh lohna, (inefi­ciency of service) a ni. Mizote hi hlawh lak kan phur em em a, hlawh kan lak tlaiin kan phun nasa a, kan hlawh tam ngaihtuah hian hna hi kan thawk ṭha lo tlangpui," a ti.