UCL khelh tum Man United an chak

Manchester United-in Inrinni zan khan Old Trafford-ah Wolverhampton Wanderers chu Anthony Martial leh Alejandro Garnacho te goal hmangin 2-0 in an hneh. Erik Ten Hag-a hoten match 35 aṭangin point 66 an hmu a, an khelh hmabak match thuma vawi hnih an chak chuan Europe inelna sang ber Champions League-ah an inlan ang.

Old Trafford boruak

Man United hian season pangngai tak hmang mah se khualmuala an result ṭhat loh avangin season ṭha tak tia sawi a rem lo. Ten Hag-a hote hi an goal difference pawh 10 chauh a ni a, an ṭhenawm Manchester City goal difference 58 nen a inthlau hle.

Mahse, Old Trafford-ah erawh Man United an che ṭha. Ten Hag-a hote hian Wolves lakah inkhel an thunun a, goal erawh khung an harsat. Mualneitu hian Marcus Rashford awm loh an tuar a, chutihrualin inkhel an thunun em avangin hnehna an chang tho.

Minute 32-naah Bruno Fernandes-a ball pass ṭha um luttu Antony ball pek chu Anthony Martial-a'n awlsam takin a khung. Wolves keeper Daniel Bentley a che ṭha - Man Untied-in goal hnihna an khung mai lo a, 1-0 chauha hma an hruai avangin hun tawp thlengin an hlauthawng thung.

Inhliam vanga hun rei tak chawl Garnacho chu minute 81-naah a rawn lut a, Argentine forward hian Bruno ball pek chu um lutin injury time-ah chak nemnghehna goal a khung. Man United 2-0 in an chak.

Golden Glove - De Gea

Man United-in goal an chhuah lo a, David de Gea-a'n tun season-ah vawi 16 a clean sheet. Spanish kepeer tluk pha thei hi chu la awm bawk mah se Premier League bikah tun season-ah khum thei an awm tawh lo.

De Gea hia a vawi hnih nan Premier League Golden Glove a dawng dawn. Chutihrualin Spanish keeper hi a ball sem a ṭhat tawk loh avang leh tihsual a ngah avangin Man United hian keeper an zawng nia sawi a ni a, United no. 1 a ni zel ang em, tih hi a chiang lo.

UCL inchuh

Newcastle United-in manager thar nei Leeds United an lenchilh a, player 10-a khel Big Sam-a hote nen 2-2 in an inhnehtawk.

Sam Allardyce-a enkawl Leeds-in Luke Ayling hmangin minute sarihna lekah hma an hruai a, Patrick Bamford-a'n minute 28-naah penalty hlah lo se chu 2-0 a hma hruai thei tur an ni.

Magpies erawhin penalty an hmuh an hmang ṭangkai a, Callum Wilson hmangin minute 31-naah siphurh an sut. Wilson bawk hian penalty aṭang bawkin minute 69-naah hmahruaina goal a khung.

Tlak hlau Leeds an tlawm duh lo a, Rasmus Kristensen hmangin minute 79-naah siphurh an sut. Injury time-ah Leeds player Junior Firpo chu hnawhchhuah a ni a, Whites an ṭangtluan hram.

Newcastle-in point hnih an hloh avangin Man United nen an point hmuh zat a inang a, an goal difference a ṭhat zawk avangin pahnihnaah an awm.

Magpies-in Brighton, Leicester City leh Chelsea an la hmachhawn dawn a, Man United-in Bournemouth, Chelsea leh Fulham te an la hmachhawn dawn. Heng club pahnih chetsual hi Liverpool-in an chang.

Jurgen Klopp-a hote hian zanin dar 12:30 hian relegation zone-a awm Leicester City an tlawh dawn a, UCL khelh beiseina nei chhunzawm turin chak ngei a ṭul dawn a ni.