KHAWTHLIR

Cyclone Mocha mi 4,619 velin tuar

Disaster Management & Rehabilitation (DMR) minister Lalchamliana'n Mizoramah mi 4,619 velin Cyclone Mocha an tawrh thu nimin khan Hnam Rûnah a sawi. Lalchamliana chuan, Cyclone Mocha tuartute chhawmdawlna tur pawisa district tinah dahlâwk vek a nih thu sawiin, "District Disaster Management Committee-te'n buaina awm loin hma an la vek turah kan ngai a ni," a ti.

Apex Bank ATM 26-na

Kolasib DC John LT Sanga chuan nimin khan Kolasib Project Vengah Apex Bank automated teller machine (ATM) bun thar a hawng a; ATM chu khawtlang tana thil ṭangkai tak a nih angin a enkawl leh vil kawngah pawh khawtlang anga ṭanrual a pawimawh thu a sawi. Kolasib Project Venga ATM hawn thar hi Mizorama Apex Bank hnuaia ATM 26-na a ni.

K Thangsiama vui liam

Mizorama revival speaker lâr ṭhin Upa K Thangsiama (95), Venghlui, Aizawl chu nimin zing dar 8:50 khan a thi a, nimin chawhnu dar 2 khan an inah vui a ni. Upa K Thangsiama hi Mi Lungngaite Ṭhian Team dintu leh hun rei tak chhung team speaker a ni.

MPCC treasurer

Mizoram Pradesh Congress Committee (MPCC) president Lalsawta chuan nimin khan MPCC treasurer aṭanga Zodintluanga Ralte a ban tak avangin a aiawh turin MPYCC president ni lai Dr Lalmalsawma, Kulikawn a ruat. MPYCC president atan vice president ni lai Laltawnliana, Zarkawt a ruat bawk.

Rengkashya-ah chawlh puang

CADC-a Rengkashya bialah naktuk hian MDC thlanna neih a nih dawn avangin Mizoram sorkara General Administration department chuan Rengkashya biala sorkar leh bank hnuaia thawkte'n vote an thlak theihna atan vote thlak ni (May 17) chu chawlhah a puang.