Puih ngaite cheng nuai 2 kan pe dawn, a ṭul chuan a aia tam pawh - MPCC

MPCC Media hruaitute chuan nimin khan Aizawl Press Club-ah thuthar thehdarhtute kawmin, sorkarna an chang a nih chuan Ṭang Puihna hmangin puih ngaite cheng nuai hniha an ṭanpui dawn thu an sawi a, "A ṭul chuan a chunglam thleng pawhin pek an ni ang," an ti.

MPCC Media chairman Dr Lallian­chhunga chuan, sorkarna an siam a nih chuan dinchhuah tuma ṭan la mekte leh theihtawpa ṭan lak tum zawng zawngte chu Ṭang Puihna hmangin an mamawhna zawn takah an ṭanpui dawn tih sawiin, "Dinhmun ṭha zawkah chhungkaw tin dah kan tum. Ṭanpuina hi an mamawh dan a zirin cheng nuai hnih leh a ṭul chuan a chunglam thleng pawhin pek a ni ang," a ti a, ṭang thei lote pawh puiin, ṭang duh lote erawh puih an nih loh tur thu a sawi.

Dr Lallianchhunga sawi danin, India rama sorkar sum leh pai enkawl dan thlak danglam a nih tawh avangin state sorkarin a sum hmuh tam zawk chu a duhna apiangah a hmang thei tawh. Chuvangin, Ṭang Puihna scheme ti hlawhtling tura sum leh pai ngai ang ang chu budget-ah dah theih vek a ni. Congress sorkar lai khan NEDP-ah cheng vbc. 1000-te an lo dah tawh ṭhin a, Ṭang Puihna tur pawh budget-ah vaibelchhe tam tak dah leh a ni dawn.

Tin, state sorkar sum ti hek lutuk loa central scheme hrang hrang nena kalpui theih te, Ministry of Micro, Small & Medium Enterprises (MSME) nena ṭangkawpa kalpui theihte leh Ministry of Food Processing Industries nena ṭang­kawpa tih theihte a tam. Hnathawktute mumal zawka an inhlawm khawm a, awmze nei zawka a market thlenga buaipui a nih theih nan Primary Agricultural Credit Society (PACS) leh self help group-te hman ṭangkai a ni dawnbawk.

MPCC Media Chairman chuan Ṭang Puihna chu sem policy nen a danglam daih nia sawiin, "A danglamna chu, a mamawh tak takte chauh ṭanpui an ni ang a, a mamawh lote hnenah pek a ni ve dawn lo. Congress Party-in kan ti ang an tih chu an tih mai ṭhin avangin kum 2023 MLA inthlanah hian sorkarna kan siam a nih chuan chhungkaw tin, mimal tinin nasa takin hma an sawn ngei dawn," a ti.

MPCC Media sawi dangte

■ Din chhuah ngei tuma ṭan lak tumte emaw, ṭan la mek tawhte, lo leh huan thlai neite, ran vulhtute, sumdawnna bul ṭan duh leh bul ṭan tawhte, hmasawn zel duhte chu an mamawhna zawnah tak ṭanpuina cheng nuai 2 emaw, an mamawh dan azirin a aia tam pawh kan pe dawn.

■ Thlai chi hrang hrang chingtute tan thlai chi, khawl mamawh, lei ṭha leh rannung laka vennate kan pe ang.

■ Ran vulhtute mamawh em em ran chaw man tlawm zawkin kan pe ang a, ran vulh tur thlengin kan ngaihtuahsak ang.

■ Sumdawnna bul ṭan duh, ruahmanna fel tak neite chu bulṭanna tur kan tum sak ang a, bul ṭan tawhte pawh an mamawhna zawnah kan pui ang.

■ Ṭhalai/zirlaite, eizawnna tlak thiamna bik mamawhten an mamawh ang thiamna an neih theih nan Ṭang Puihna hnuaiah hian zirna leh training chi hrang hrang buatsaih a ni ang.

■ Hnathawktuten district level, constituency level, block level, khua leh veng, society/asociation/zau ang zawnga an mamawh inṭawm chi hrang hrang siamna atan cheng vaibelchhe tel ṭanpuina pek theih a ni ang

■ Ṭang Puihna policy-in a tum ber pakhat chu tharchhuah tam, thawhchhuah tam a ni a, area a zirin thlai chin tur bik fel taka siam a ni ang a, an tharchhuahte chu a hralhna fel tak a awm theih nan hetiang hian ruahmanna siam a ni :

■ Lohuan neitute tharchhuah chi hrang leitu tur company biak fel sa vek an ni ang a, a hralhna tur a awm tih hresain lo/huan an nei tawh ang.

■ Ran vulhtute vulhchhuah hralhna kawngah harsatna a awm ngai lo na a, felfai zawk leh hlawk zawk, zau zawka marketing a kal theih nan ruahmanna siam a ni ang a, a ṭul a nih chuan tualchhunga vulh chhuahte a hnawn loh nan state pawn aṭanga lakluhte control a ni ang.

■ Online leh offline-in farmers’ market siam a ni ang.

■ Hnathawktute tana harsatna thlen theih dante siam ṭhat a ni ang.

■ Marketing buaipuina tur vaibelchhe eng emaw zat budget-ah dah a ni ang.