Larsapin MZU-ah National Seminar a hawng

Mizoram University (MZU)-a Department of Mass Communi­cation chuan nimin khan MZU Guests' House conference hall-ah 'National Seminar on National Integration Through Cultural Exchange' an buatsaih a, governor Dr Hari Babu Kambhampati, MZU chief rector ni bawkin a hawng. Seminar hi vawiinah chhunzawma zawh a ni ang.

Governor Hari Babu Kam­bhampati chuan, MZU-in ram mipuite inpumkhatna kawnga seminar a buatsaih chu ṭha a tih bakah tunlai boruak thlirin ṭul a tih thu a sawi a, "Unity in Diversity kan tih fo, ram pakhata chengho, hnam ziarang leh khawsak phung inang lo tak takte in dawhtawna, ṭha taka awm tlân hi India ram angah phei chuan a pawimawh hle," a ti a, inpumkhatna tura theihtawp chhuah chu khua leh tui zawng zawngte mawhphurhna a nih thu a sawi.

Sorkar laipuiin state hrang hranga chengte inhmelhriatna atan leh intlawhpawhna atan Ek Bharat Shreshtha Bharat prog­ramme a kalpui tih sawiin Larsap chuan, "He programme hian awmzia a nei a, inpum­khatna kawngah a ṭangkai hle tih a hriat a ni. Inpumkhata in hre chiang tur leh in­kàwm­ngeih tur chuan a taka inchenchilh leh hmaichhan ngeia inkawm tluk a awm lo a, hemi kawngah hian cultural exchange program-te hi a theih anga zinga kan kalpui a ṭha hle," a ti.

Hawnna in­khawm­ah hian khual­zahawm Prof. Sunil Umrao, University of Allahabad; MZU acting vice chancellor Prof. Pravakar Rath, registrar Prof. Lalnundanga leh SEMIS dean Prof. Bhartendu Singh-te pawhin thu an sawi.

Seminar neih chhung hian session 6 – offline session 2 leh online session 4 neih a ni dawn a; session tinah hian seminar thupui hnuaiah zir bing tura mithiamten an thuziah an rawn chhawp chhuahte zirho a ni ang.