PC party-in Manipur Zofa MLA-te an thlawp

PC party hruaitute chuan nimin khan Aizawl Press Club-ah thuthar thehdarhtute kawmin, Manipur-a Zo hnahthlak MLA-te duhdan an thlawp thu an sawi.

PC president Vanlalruata chuan, an party-in Manipur-a Zo hnahthlak MLA 10-in Manipur-a Zofate tana inawpna (administration) hran an phût chu an thlawp tih sawiin, "A theih leh remchan anga ṭanpui kan remti a ni," a ti.

Chin-Lushai-Kuki an tih hi hnam khat leh unau an nih thu sawiin Vanlalruata chuan, "Tuna Bangladesh, Burma leh India ram chhung zau tak hi kan ram a ni a, Burma leh India-a lalram ropui leh zau tak tak awm tawhte khan min awp ngai lo," a ti a, kan chheh vela hnam dang lal ram dinte pawhin min awp ngai loh thu a sawi.

PC President chuan British-in tharuma min lak hma khan tumahin kan ram hi min awp ngai lo tih sawiin, "Tharuma kan ram min hneh chhuh saka, min ṭhendarh sak kha kan pawm thei lo. Rorelna pakhat hnuaia awm kan duh avangin Brig. T Sailo-a hoin ZORO kan lo din tawh," a ti.