Lengpui Airport-a harsatnate sawiho a ni

Rajya Sabha MP K Vanlalvena leh GAD (Aviation) principal consultant Wg.Cdr. J Lalhminglianate chuan nimin khan New Delhi-ah Director General Civil Aviation (DGCA) hotute an kawm a, Lengpui Airport Airlines Service leh airport hman ṭangkai dan chungchanga an sawipui.

Sorkar thuchhuah tarlan danin, Mizoram sorkar aiawhte hian DGCA hotute hnenah hian Lengpui Airport-ah hmar lam hawi zawng chauha thlawhtheihna ṭum phal a nih avangin hmar lama khua a chhiat chângin thlawhtheihnate an ṭum theih loh phah ṭhin tih an sawi a, a rem lam lam aṭanga ṭum theih tir turin an ngen. DGCA hotute chuan hei hi tihhlawhtlin a nih theih nan a rang thei ang bera Lengpui Airport tlawh turin Aizawl rawn kal an tum thu an sawi.

Sawiho dangte

▶ Lengpui Airport hi table - top airport anga puan a nih avangin ambulance thlawhna lo ṭum tur reng reng khalhtu (pilot)-te hi a hmaa pilot instructor-in a lo clear lâwk tawh an nih loh chuan ṭum phal an ni lo a, hei hian damlo phur thlawhna lo lut turte tan harsatna tam tak a thlen ṭhin.

▶ He khuahkhirhna hi awm tawh lo turin Mizoram aiawhte chuan an ngen a, DGCA hotute chuan a hma thei ang bera tihlawhtling turin hma lak nghal an tiam a ni.

▶ Lengpui Airport runway lights hi visibility a ṭhat tâwk loh laiin chhunah pawh hman a ngai ṭhin a, tuna runway lights vuah mek hi a ṭha tâwk lo.

▶ DGCA hotute chuan thim thut thut leh khawchhiat lai pawha hman tlak turin Mizoram sorkar hmalakna chu a rang thei ang bera clearance pe turin Aizawlah an rawn kal dawn tih an sawi.