Minister of state-in hriatthiamna nei turin hrilh

Minister of state TJ Lalnuntluanga chuan nimin khan 23 Sector Assam Rifles DIGP Brig. Girish Upadhya chu a pisaah a kawm a; Mizoram leh Myanmar ramri hnaiha awmte chu eizawnna mumal tak nei lo an nih avangin sumdawnna (border trade) kalpui kawngah hriatthiamna zau tak neih a ṭul thu a hrilh.

TJ Lalnuntluanga chuan Mizoram leh Myanmar ramri venhim kawnga Assam Rifles-te inpekna leh hnathawh chu fakawm a tih thu a sawi a, "Mizoramin industry leh leihnuai hausaknate kan la nei ṭha rih loa, chuvang chuan ramri hrula awm khuate hi eizawnna mumal tak nei lo an nih avangin sumdawnna (border trade ) kalpui kawngah hraitthiamna zau tak neih a ṭul," a ti.

Girish Upadhya chuan, Assam Rifles-in a duh apiang tan Hindi zirna an buatsaih ṭhin thu Minister hi a lo hrilh a ni.

Sorkar thuchhuah tarlan danin, Minister leh sipai hotu inkawm hian Champhai district-a sumdawngten harsatna hrang hrang an tawhte chu a rang lama sutkian a nih theih nan a hmunah ngei tlawh dun an remti a; Assam Rifles, NGO leh kohhrante inkarah thawhhona ṭha a awm zel theih nan hmalak tlân zel an tum thu an sawi bawk.