Kolasiba 4-lane kawng kal dan tur inhrilhfiah

Kolasib bawrhsap John LT Sanga kaihhruaiin nimin khan DRDO conference hall-ah Bharatmala Pariyojna hnuaia NHIDCL kaltlanga Kolasiba 4-lane kawng kal dan tur chungchang inhrilhhriatna neih a ni a; Bharatmala Pariyojna hnuaia 4-Lane kawng siam tura package 3, 4, 5, 6 leh 7 hian Kolasib a paltlang dawn a ni.

John LT Sanga chuan, ni tin nunphungah leh eizawnna dapna kawngah hmasawnna awm tur chuan inkalpawhna ṭha neih a pawimawh hmasa tih a sawi a, "4-Lane kawng hian Kolasib district chhungah hmasawnna nasa tak a thlen ka beisei. Hna thawh ṭan thuai a nih theih nan leh hnathawh ṭan huna leivung paih kawngah te, ṭul loa ram leilung tih chereuna a thlen loh nan leh a nih dan tur ang taka kawng ṭha kan neih theih nan sorkar ang leh khawtlang ang pawha vilpui a pawimawh dawn," a ti.

Ṭhutkhawma tarlan danin, Bharatmala Pariyojna hnuaia 4-Lane kawng siam tura package 3, 4, 5, 6 leh 7 hian Kolasib a paltlang dawn a, Vairengte leh Sairang inkar kawng thui zawng hi km 111 niin, kawng thar siam tur hi km 90.25 a ni thung.

Kawng kal dan tur ruahmanna hi siam fel vek tawh a ni a, Mualkhanga lei (bridge) metre 500 a thui dawh tur chu lei dawh zinga sei ber tur a ni. Lui luang tibuai lo tur ang berin ruahmanna siam a ni a, kawng sirah thing phun dan tur ruahman tel a ni. Leivung dah khawlna tur eng emaw zat endik a ni tawh a, lirthei lian tana zawh nuam tura siam tum a ni.

Sairang chhaka lirthei intawhkhawmna pengṭhuam (junction) ruahman a ni a; toll booth dah a ni dawn lo a, hna hi thawh ṭan aṭanga kum hnih chhunga thawh zawh tura ruahman a ni.

He hunah hian Turial bialtu MLA K Laldawngliana, Kolasib district-a PWD, PHE, Power & Electricity department leh Divisional Forest Office hotute bakah, Kawnpui, Khamrang leh Mualkhang khawtlang hruaitute an tel.