Kan tih theih loh tur kan sawi tur a ni lo - MBJP President

Mizoram BJP chuan nimin khan an pisa-ah chhung inkhawm an hmang a, an president Vanlalhmuaka chuan tih theih loh tur sawi tur a nih loh thu a sawi.

Vanlalhmuaka chuan political party dangte angin BJP chuan an tih theih loh tur an sawi tur a ni lo tih sawiin, "Politics hi inbumna tur leh sumdawnna tur a ni loa, keini BJP chuan dawt hmanga tlin ai chuan tlin loh mai pawh kan thlang zawk tur a ni. Cheng nuai 3 leh nuai 5 sem tih ai chuan PM schemes aṭangin dan fel tak hmang leh kan hnathawh dan a zirin heng sem an tum aia tam hi kan la hmu dawn zawk," a ti.

Mizoram BJP chuan kum 9 chhunga BJP leh Narendra Modi-a kaihhruai sorkarin India ram tan, Mizoram tana a hnathawhte chu Mizo mipui te'n an hriat chian leh zual nan hma an lak dawn thu leh thudik leh ram hmasawnna tur tak thlen theitu party chu Mizo mipuite hian an la hmu fiah dawn niin Vanlalhmuaka chuan a sawi.

MBJP President chuan, Karnataka inthlanah hnehna an chan tak loh avangin BJP a chhe ta duai tihna a ni lo tih sawiin, "Kum 2014-ah pawh BJP sorkarna chu state parukah chauh a nih laiin Lok Sabha MP inthlanah erawh BJP leh a thawhpui party-te chuan sorkarna siamin Pu Narendra Modi chu prime minister atan ruat a ni," a ti.