Party zinga nationalist ber MNF - R Lalzirliana

Mizo National Front Ṭawi East Block chuan nimin khan Keifang Zawlbukah media & political training an buatsaih a, an hun hmanpuitu MNF adviser R Lalzirliana, minister chuan political party zinga nationalist ber chu MNF niin a sawi.

R Lalzirliana chuan, MNF chu political party zinga nationalist ber, India pawh kâp ngam an nih thu sawiin, "MNF sorkar lai hian Pathianin thil ropui tak min tihsak a tum niin ka hria. Kan chipuite tawrh ai tuar ngam chief minister Pu Zoramthanga kan nei hi Zofate kan vannei hle. Hun khirh tak tun term chhunga kan tawhah, kan hotute chak hle lo se tun ai hian kan tlachhia ang," a ti.

Ram leh hnam chhanna kawngah huai tur a nih thu sawiin MNF Adviser chuan, "Kan huai ngam lo a nih chuan kan dik tawk lo tihna a ni. Kan dik chuan ṭanpuitu kan nei mai zel. Tuna Manipur buainaah an sorkar leh official lamte an demawm hle. Manipur Zofate khi Meitei rama awm an ni lo a, hmakhawsang aṭanga an lo awm tawhna a ni zawk," a ti a, Manipur Zofate chu humhim tlat an ngaih thu a sawi.

MNF Adviser chuan an party chu ruhkawl lian ber an nih thu sawiin, "Inthlanpui hmachhawn turin lungrual takin kan inbuatsaih a hun tawh. Politics-ah chuan mahni inhmuh dan aiin midang min hmuhdan a pawimawh ber. Party leh pawl hrang hrang kal­khawm ZPM hi an inrelbawl dan a mumal lo hle. An CM candidate ber pawh party-a a dinhmun a chiang lo," a ti.