Motor Bike Rally-a telte Minister hoin hmuak

23 Sector Assam Rifles leh Mizoram Outdoor Youth Club ṭangkawpin May 4, 2023-a an buatsaih ‘Motor Bike Rally’-a telte chuan Mizoram ramria khaw hrang hrang an tlawh hnuah nimin khan Aizawl an lo thleng a, Gajraj Hall, Lakhimpur Battalion-ah hmuahna inkhawm neih niin, minister of state TJ Lalnuntluanga'n a hmanpui.

TJ Lalnuntluanga chuan, Mizorama bikers ṭha tak takten ramri hnaiha awm khuate tlawh chhuaka tluang taka Aizawl an lo thleng thei chu lawmawm a tih thu a sawi a, "Hnam dangte tih tur chauha ngaih ṭhin kha Mizo tlangvalte ngeiin an ti thei ve a ni. Ram leh hnam hmasawnna turin theihtawp chhuah tlân a ngai a, inngaihhniamna nei loa ‘ka ti ve thei a ni’ tih thinlung put a pawimawh hle," a ti a, Mizoram tan ṭhahnem ngai taka penchhuak zel turin a sawm.

Bikers-ten ramri khuate harsatna hrang hrang an sawite chu Mizoram sorkarin a hria a tih sawiin Minister chuan, "Hma pawh a la a, mahse Covid hripui avang khan India ram pum leh khawvelin harsatna a tawk a, duh angin kan thawk chak thei lo a ni," a ti

Forest Minister chuan tuihna humhalh leh thing leh mau chereu zel tur ven nan Japan International Cooperation Agency nen thawhdun tum a nih thu a sawi a, "Project pawh a hlawhtlin thuai ka beisei. Rilru put hmang thlak zel a, thing leh mau tihchereu, bawlhhlawh thlahdah taka paih leh environment-tichhe lo zawnga hmasawn zel a ṭul," a ti a, Mizoram hi ka ram a ni tih rilru pua duat leh hmangaih taka enkawl tura rilru siam thar a ngai takzet thu a sawi.