Politics-ah Pathian ram a thlen theihna atan Theihtawp chhuah a ngai - ZPM Vice President

ZPM chuan nimin khan an pisa-ah chhung inkhawm an nei a, thusawitu ZPM vice president Lalthansanga chuan politics-ah Pathian ram a thlen theihna atan theihtawp chhuah a ngaih thu a sawi.

Lalthansanga chuan, ZPM chu 'kan ram politics-ah Pathian ram lo thleng rawh se' tia an au ṭhin thu sawiin, "Hei hi a pawimawh khawp mai, a thlen ngei theihna turin theihtawp kan chhuah a ngai a ni. Kan thil tihna reng rengah keimahni in dah ṭha hmasa ila, kan Bible-in min hrilh angin a ram leh a felna hi zawng hmasa zel ang u," a ti.

Vawiin thlenga Mizoram lo enkawl tawh­tuten an theihtawp an chhuah ve ṭhin tih sawiin ZPM Vice President chuan, "Hruaitu hmasaten theihtawpa an lo beih tawhte tihlawhlting turin keini ZPM-te hian kan hmaah tih tur pawimawh tak kan nei a ni," a ti a, mipui ni loa anmahni an indah hmasak chuan chunglamin mal a sawm loh tur thu a sawi.

Lalthansanga chuan ei leh bara intodelh sawi a nih ṭhin thu sawiin, "Tuna kan ram dinhmun thlir chuan kan intodelh lo em em a, ṭhalai tam tak ram pawnah eizawng tura an chhuah a ngai a, hei hian kan ram ei leh bar dinhmun chhiatzia a tarlang chiang hle. Kan ṭhalaite rilru a harh mek a, intodelh duhna an nei lian. An duhna tihlawhtling turin ZPM-ah beiseina sang tak an nei," a ti.