Eptute'n CM leh Sports Minister an bei nasa

MNF chuan nimin khan Hnam Rûnah chhung inkhawm an hmang a, thusawitu MNF adviser Lalchamliana, minister chuan eptute'n Chief Minister leh Sports Minister-te an beih nasat thu a sawi.

MNF Adviser chuan, eptuten CM leh Sport Minister-te an bei nasa chungin CM chu a ngawi thei hle tih sawiin, "Pu Lalduhoma'n peace bonus chungchangah kan pu nasa takin a bei a, mahse document nen lam Pu Robert-a’n Home Ministry-in peace bonus a pekna a lo nei vek si. ZPM hotupa chu dawtsawi a lo ni ta. Tun session-ah khan, infiammi pakhat inenkawlna pek chungchangah Assembly House-ah Pu Duha'n social media a rin lutuk vanga thudik lo a sawi vang leh ngaihdam a dilavangin, kan CM leh RRR-a hi an hotupa timualphotu an nih vangin an bei nasa bik a ni," a ti.

Lalchamliana chuan an hruaitu hmasate khan nasa takin an theihtawkin ram tan hna an thawk tih sawiin, "Development reng reng hian hun a duh," a ti a, state dang Mizoram aia upa leh changkangte nen intehkhin chi a nih loh thu a sawi.

ZPM chungchang sawiin MNF Adviser chuan, "Hlawhtlinna leh thangṭhat an han lak deuh chuan thehhmeh ang maiin an Val Upa Council-te chu an reh ta a, an MLA leh Corporator te hian an fund hman danah hian mipui a huap bik em? India dan hnuaiah rinawmna kan tiam a, India hnuaia kan awm chhung chu dan bawhchhiain kan awm thiang lo, enge an kalphung thar tih hi sawi tur pawh an hre bik lo a ni," a ti.