Lok Adalat-ah thubuai 1,307 chingfel

May 13, Inrinni khan Mizoram district hrang hrangah Lok Adalat neih a ni a, thubuai 1,307 chinfel niin, thubuai chinfel zawng zawnga sum zat chu Rs 6,23,87,050.50 a tling.

Lok Adalat hi court-in ngaihtuah kher loa samkhai zawka thubuai chinfelna, inkhingte inremtirna a ni a, May 13 khan India rama state leh union territory hrang hrangah neih niin, Mizoramah pawh Gauhati High Court Aizawl Bench hnuaia district court pariatah buatsaih a ni.

Mizorama Lok Adalat-ah hian thubuai ngaihtuah tur 3,040 a awm a, thubuai zinga a tam ber chu telephone bill bá, bank loan rulh rulh that loh, in hmun lo ram thubuai, mimal sum inpûksak leh ro inchuh chungchangte a ni.

Thubuai 3,040 zinga 1,307 chu chinfel a ni a, settled amount chu Rs 6,23,87,050.50 a ni.