Manipur buaina avanga Delhi-a kal NGO Coordination Comtt. hruaitute'n mi pawimawh hrang hrang an kawm

Manipur buaina avanga Delhi-a kal All NGO Coordination Committee hruaitute chuan nimin khan Union Home minister Amit Shah, Union Law minister Kiren Rijiju leh All India Congress Committee (AICC) hruaitu Rahul Gandhi an kawm.

Ruahmanna siam a nih dan chuan Mizoram NGO hruaitute hian May 14, Pathianni zan khan Amit Shah hi hmu tur an ni a, mahse a remchang thei lo. Nimin khan Amit Shah hi hmuh tumin an kal leh a, tlai dar 2:30 vel khan an hmu thei a ni. Amit Shah an hmuh hnu hian Kiren Rijiju hmuin, chumi hnuah Rahul Gandhi an hmu leh a ni.

Vanglaini thudawn danin, Mizoram NGO hruaitute hian Amit Shah, Kiren Rijiju leh Rahul Gandhi-te hi Manipur buaina a reh thuai theihna atana hma la tur te, Zohnahthlakin harsatna an tawh hrang hrang te, sorkar laipui inrawlh a ṭulna chhante leh thil dang pawimawh hrang hrangte an sawipui a ni.

Amit Shah, Kiren Rijiju leh Rahul Gandhi-te hian Mizoram NGO hruaitute thu thlen hi ṭha taka lo dawngsawngin, a ṭul ang leh a thei ang anga an lo bawhzui tur thuin an chhang a ni.

Delhi-ah hian CYMA Vice President bakah hian CYMA fin. secretary Roneihthanga, MUP vice president Lalbiakmawia Khiangte, MHIP president Ngurmawii Sailo, MZP gen. secretary Jacob Lalmuanpuia leh MSU vice president Laldinsangate an kal.

Mizoram Kohhran Hruaitute Committee (MKHC), political party hrang hrang, Mizoram Journalist Association (MJA) leh NGO hrang hrangte May 6, 2023-a Central YMA pisa ṭhukhawm chuan Manipur buaina chungchanga central sorkar hotute dawr hi an rel a ni.

Meeting chuan, "Manipur tualchhung buaina avanga Zohnahthlak unaute tawrhna chungchang leh a kaihhnawihte hi central sorkarah thlen ni se kan ti. All party, NGO leh MKHC-ten aiawh intirin New Delhi-ah central sorkar thuneitute hmuh ni se," an ti.