HSLC 2023 result-ah deficit school an tiṭha ber a; sorkar school an tichhe ber

Mizoram Board of School Education (MBSE)-in High School Leaving Certificate (HSLC) Examination 2023 result a tihchhuahah sikul ṭhen hrang hrang zingah deficit school zirlaite pass percentage a sang ber a, sorkar sikul zirlaite pass percentage hniam berin 58.12% a ni.

MBSE-in HSLC 2023 result bu a tihchhuaha a lan danin, HSLC 2023 result-ah khan deficit school-te'n 92.18% pass percentage an nei a; nikum khan 88.39% neiin, nikum aia kumina an pass percentage sanna hi 3.79% a ni. Deficit school-te hi HSLC examination-ah pass percentage sang ber an ni.

HSLC examination 2023-ah khan sikul ṭhen hrang hrang zingah sorkar sikulah pass percentage a hniam ber a, 57.71% niin nikuma an pass percentage 58.12% chu 0.41% in an pha lo a ni.

Sikul ṭhen hrang hrang zingah private school-te'n pass percetage 83.5% an nei a, aided school-te'n 69.26% leh lumpsum school-te'n 65.32% an nei. Heng sikul ṭhen zinga sorkar sikul leh lumpsum school-te hian nikuma an pass percentage an pha lo ve ve a, sikul dang zawngin an khûm thung.

Deficit school-ah hian kum 2023 khan pawl 10 zirlai 1,325 awmin, an zinga 1,317 chuan exam an hmachhawn a, zirlai 1,214 (92.18%) an pass.

Private school-in zirlai 6,702 neiin zirlai exam 6,581 zinga 5,495 (83.50%) an pass a; aided school zirlai 2,801 zinga 2,684-in exam an hmachhawn a, heng zinga zirlai 1,859 (69.26%) an pass a ni.

Lumpsum school-in zirlai 638 an nei a, heng zinga zirlai 618 chuan exam hmachhawnin zirlai 403 (65.32%) an pass a; sorkar sikulah zirlai 6,880 awmin zirlai 6,579-in exam an hmachhawn a, zirlai 3,797 (57.71%) an pass.

Kumin HSLC exam-ah hian private candidate zirlai 362 an awm a, exam hmachhawntu zirlai 324 zinga 66 (33.95%) an pass bawk.

Covid-19 hripui leng vangin kum 2021 leh 2022 khan HSLC syllabus chu 30%-a tihtlem a ni a; kum 2023-ah erawh syllabus pumpui zir a nih bakah, exam question-ah zirlai thiam bikte tana an thiamna pholang thei tura zawhna her danglam - appilication leh higher order thinking skills (HOTS) question 40% dah a ni.