Aizawl Smart Street lungphum phum

Deputy chief minister Tawnluia chuan nimin khan Khatla-a Industry office kawtah Aizawl Smart Street sakna tur lungphum a phum. Aizawl Smart Street hi cheng nuai 328 senga sak tur niin, contractor chu Unique Consultancy Service a ni ang.

Tawnluia chuan, Aizawl hmun laili taka mipuite in tihthawvenna tur hmun Smart Street sak a ni tur chu Aizawlin a mamawh tak a nih thu a sawi a, "Aizawl Smart City aṭangin cheng vaibelchhe tam tak hmuh a ni a, chumi hmanna tur chu project hrang hrang kalpui mek a ni, "a ti.

Smart City hnuaia project-ho hi department pakhat chiah hnathawh chi a nih loh avangin department hrang hrang nena inbiakna leh guidelines mumal taka thawh ṭhin a nih thu sawiin Tawnluia chuan, "Smart Street project hi duh anga ṭan hma a nih theih loh nachhan chu a project sakna hmun tura lo awm hmasate hmun remchang zawka sawnchhuah an ngaih vang a ni," a ti a, project thawktu turte leh contractor-te chu chulmam nawn ngai loa felfai taka hnathawk turin a hrilh a ni.

Aizawl mayor Lalrinenga Sailo pawhin thu sawiin, sorkarin a project hrang hrangah ṭhalaite lam hawi project-te a ngai pawimawh tih a sawi a, "Aizawl Smart Street pawh sak zawh a lo nih hnuah fai taka enkawl zui a pawimawh a ni," a ti.

Smart Street lungphum hi Khatla, Industry office kawtah phum a ni a, a project hi Aizawl Smart City hnuaia mi a ni. Mechanical parking, open gym leh intihhlimna tur thil chi hrang hrang awm thei tura ruahman a ni.