Thah ni ngeia hriat ruang chhar a ni; Police-in a chhuitu tur team an din
Nimin zing dar 5 vel khan Serchhip Bukpui leh Chhiahtlang Chhim Veng inkar kawngthlangah ruang pakhat chhar a ni a, thah a nih ngei rin a ni. He thil thleng chhui chiang tur hian police chuan special investigation team (SIT) an din.
Vanglaini thudawn danin, Chhiahtlang Chhim Venga nupa pakhat Bukpui rama feh tura kalte chuan nimin zing dar 5 vel khan Chhiahtlang Chhim Veng leh Bukpui inkar kawng, NH 54-ah thisen nasa taka bua an hmu a, an enfiah hnuah kawngthlang ft. 40 vela hlaah ruang ni ngeia hriat an hmu tel a ni.
Chhiahtlang Chhim Veng mite hian YMA hruaitute hriattir nghalin, anni chuan police-te an hriattir ve leh nghal a ni. Police-te nen ruang hi enfiah a nih hnuah NHIDCL computer operator Lalsangzuala (31), Mission Vengthlang, Aizawl a ni tih an finfiah.
Chiang zawka ruang endik turin Aizawl aṭangin forensic expert-te chah an ni a, anni hian chawhma lamah ruang chharna hmun hi thlengin, ruang hi an endik nghal.
An endik zawh hnuah ruang hi Serchhip District Hospital-ah postmortem a ni a, tih tur ṭul dangte tih zawh a nih hnuah Mission Vengthlang panpui a ni.
Lalsangzuala hi mi kut tuara boral ngei niin a lang a, a taksaah kutthlakna hnuhma awmin a hmai lamah nasa taka kutthlak niin a lang. Kawngpuiah pawh thisen buakna hnuhma hmuh tur ṭhahnem tak a awm.
Lalsangzuala hian NHIDCL-in an hire sak motor (bolero) a kawl a, May 15, Thawhṭanni zan khan Aizawl aṭangin motor danga rawn chhoin, a driver Lalramtluanga, Chhiahtlang Chhim Veng chuan Chhiahtlang dai Thinghmunkawn-a KRAM company hmunah a lam a ni.
A driver-te inah hian Lalsangzuala hian zanriah eiin, a mu nghal a ni. Lalramtluanga hian zanlai vela a harh chuan Lalsangzuala hi a lo mu tawh lo niin a sawi. Bolero hi zana a dahnaah lo awm tawh loin, nimin vêk khan Chhiahtlang Chhim Veng YMA Rûn zâwn, kawngpui kama mi thingkhawn su-a hmuh a ni.
He thil thleng chungchang hi police-te chuan chhuizui nghalin, hnu chhui hna a chak lehzual theihna atan Serchhip SDPO Kaste Romalsawma kaihhruai SIT din a ni.