Mizoram NGO-te Zofate tan an che chhuak; Rei loteah Manipur-ah boruak muanawm a awm Union Home Minister-in a beisei

NGO Coordination Com­mittee hruaitute chu May 15, Thawhṭanni tlai khan Delhi-ah kalin, Manipur buaina chung­changah mi pawimawh hrang hrang an kawm a, Union Home minister Amit Shah chuan Manipur-ah boruak muanawm a awm thuai a beisei thu a lo hrilh.

NGO hruaitute hian Union Home Minister hi a office-ah hmuin, Mani­pur-a buaina a reh thuai theihna atana hma la tur leh Manipur buaina tuartute chhawm­dawl hna chak taka thawk tura ngenin, Zo hnahthlak unauten an tawrh nasat zia leh mahni inlum pawh luah ngam loa Mizoram leh hmun hrang hranga an raltlan thu leh Mizote thinlung natzia an thlen.

Buaina avanga zirna bahlah zawng zawng, a bik takin Mizoram aṭanga Manipur-a lehkhazirten ṭha tak leh boruak muanawm tak hnuaiah an zirlai an chhunzawm thuai theih nan rang taka hmalak a ngaih thu NGO hruaitute chuan Amit Shah hi hrilhin, "Buaina a reh theih nan Manipur chhunga hnam hrang hrangte'n an pawm tlan theih tur inremna siam vat a ṭul," an ti.

Mizoram NGO hruaitute chuan Manipur buaina hian hmarchhak hmun hrang hrangah hlet ṭha lo a hrin chhuah belh an hlauh thu sawiin, hlet ṭha lo a chhuah lohna atana ngaihtuahna seng tur leh boruak thlir reng turin Union Home Minister hi an ngen.

Amit shah chuan Manipur buaina chu a mawhphurhna a nih thu leh an enzui reng thu sawiin, tun aṭanga ni rei loteah boruak muanawm a thlen leh vat beisei a nih thu NGO hruaitute hi hrilhin, "Ei leh in mamawhte pawh a lut mek zel," a ti.

Union Home Minister hi Union Home Secretary, Joint Secretary (NE) leh Director, IB te'n an ṭawiawm. NGO Co-ordination Committee hruaitute hian Union Home Minister hnenah hian memorandum an thehlut nghal a ni.

Mizoram NGO hruaitute hian Union Law minister Kiren Rijiju pawh a chenna inah an kawm a, Manipur buaina irh chhuahna chhan nia lang Manipur High Court order leh Supreme Court inrawlh dan chungchang an sawipui.

Union Law Minister chuan special status chungchang chu high court thuneihna a nih loh thu sawiin, North East MP forum-te'n boruak muanawm a thlen leh vat theih nana theihtawp an lo chhuah thu NGO hruaitute a hrilh.

All India Congress Committee (AICC) hruaitu Rahul Gandhi pawh Mizoram NGO hruaitute hian kawmin, Manipur buaina chungchangah a theih ang anga he buaina a reh theih nana hma la tur leh en zui reng turin an ngen.

Rahul Gandhi chuan Manipur buaina chu a lo hriat tawh thu leh a ṭul anga a lo en zui ve reng tur thu a sawi. NGO hruaitute chuan Rahul Gandhi hnenah hian memorandum an thehlut.

Mizoram NGO hruaitute hian May 11 khan Delhi thlengin, an senso chu Mizoram sorkarin a tum sak a, nimin khan Aizawlah an rawn let. Delhi-a an cham chhung hian Meghalaya chief minister Conrad Sangma leh Nagaland MP pawh an kawm bakah, Mizoram House-ah pawl hrang hrang aiawhten an kawm.