Mizoramah eirukna umbo kan mamawh - MPYCC President

Mizoram Pradesh Youth Congress (MPYCC) hruaitu tharte chuan nimin khan Congress Bhavan-ah thuthar thehdarhtute an kawm a, president Laltawnliana chuan Mizoramah eirukna umbo kan mamawh niin a sawi.

Laltawnliana chuan Mizoram mamawh eirukna umbo chu MPCC president Lalsawta hoin an tih theih ngei an rin tlat thu sawiin, "Lalsawta leh Congress party policy 'Ṭang Puihna' hmanga retheihna umbo a nih theih nan mi dik, mr. clean an tih Pu Lalsawta kaihhruai Congress party hi lo support-a, lo puibawm turin Mizo mipuite ka sawm tak meuh meuh che u," a ti.

Mizoramin hun thim leh harsa tak tak a paltlang tawh tih sawiin MPYCC President chuan, "Tunah chuan Congress kaihhruai sorkarin nasa taka hna a lo thawh tawh zar kan zo mek a, ram ralmuang leh infrastructure ṭha tak takte neiin kan khawsak theih phah ta a ni," a ti a, hun harsaa Zoram hruaitu turin Pathianin Lal Thanhawla a pek thu a sawi.

Laltawnliana chuan Lal Thanhawla a lo upat tâk avangin Pathianin Lalsawta a pe leh tih sawiin, "Pu Lalsawta hi Pu Hawla pawhin ring ngam­in a nihna phal takin a kian a ni. Tunah hian Zo­ram hian hnathawk peihte kai­chhuak tur kan mamawh. President mi rinawm leh a ngaihna hria kaih­hruaina hnuaiah Pathianin hnehna min chantir ngei kan ring tlat," a ti.

MPYCC president kal chhuak, MPCC treasurer thar Dr Lalmalsawma pawhin thu sawiin, "Mawh­phurhna thar min pek­ah hian ka inthla­­h­rungin insit a na duh hle mai. Chutih rualin kan hotute'n ka chunga rinna leh beiseina sang tak an nghat a nih chuan ka theihna sang ber hlan ka tum tlat thung," a ti a, theihtawp a chhuah dawn thu a sawi.

Dr Lalmalsawma chuan an party chuan Mizoramah mi taimate an dinchhuahna tur leh hnam taima an nih theih nan Ṭang Puihna an neih thu sawiin, "Sorkar ṭha siamna turin 'Ṭhat Loh Theih Lohna Bawm' kan nei bawk. Inlungrualna, taimakna leh huaisenna ralthuam nen theihtawp kan chhuah dawn," a ti.