PHE-in Aizawl mipuite tui ren turin a ngen

Public Health Engi­neering (PHE) depart­ment chuan thuchhuah siamin Tlawng luiah tui a tlem thu an tarlang a, Aizawl mipuite tui renchem turin an ngen.

PHE chuan Tlawng lui aṭang hian Aizawl mipui chawm turin ni khatah tui litre maktaduai 30 vel pum chhuah ṭhin a nih thu a tarlang a, "Kumin hian Mizoramah ṭhál a na hle a, Aizawl mipui rinpui ber Tlawng lui tui pawh a ni tèlin a kâm zel. Hemi avang hian ni khata tui litre mtd 30 vel pump chhuah ṭhin kha tunah hian tuihnain a daih tâk ngang loh avangin tui litre mtd 20-ah a tlak thlak a ngai ta a ni," a ti.

Ruah sur loa tui hi a kâm zel chuan tui pump chhuah theih zat tur hi nasa taka tlahniam tura ngaih a nih thu tarlangin PHE chuan, "Hemi avang hian tui sem chhuah zat pawh hi a tlahniam nghal lo thei lo a ni," an ti a; Aizawl mipuite chu an theih ang anga tui renchem turin an ngen tih an tarlang.