Sorkar laipui scheme kalpui dan thlirho

Lunglei District Deve­lopment Coordi­nation and Monitoring Committee (DISHA) chu an chairman C Lalro­sanga, Lok Sabha MP kaihhruaiin nimin khan DC conference hall-ah an ṭhukhawm a, Lunglei district-a sorkar laipui scheme kalpui mekte dinhmun leh hmalakna turte an sawiho.

C Lalrosanga chuan, Mizoram chu state dangte nen khai­khinin central scheme kalpui kawngah a thawk ṭha hle tih a sawi a, "Kan perfor­mance a ṭhat pauh leh sorkar laipui aṭangin sum kan dawn belh thei a, uluk leh taima takin thawk chhunzawm zel ang che u," a ti.

Khawvel changkang chho zelin a ken tel information technology lamah pawh hma sawn ve zel a ṭul tih sawiin MP chuan, department hotute chu scheme an kalpuina-a harsatna hrang hrang an tawhte leh central sorkara thlen sak leh bawhzui ṭulte sawi hreh lo turin a chah.

Ṭhutkhawma tarlan danin, kum 2022-2023 chhungin Lunglei district-ah MGNREGS job card holder-te account-ah cheng nuai 6591.33 thun a ni a, Lunglei district huamchhunga block pathum – Lunglei, Bunghmun leh Lungsenah kum 2022-23 chhungin ni 100 inhlawhna siam a ni. MGNREGS hnuaiah hna chi hrang hrang 2,238 thawh zawh niin, thawh mek 489 a awm a; aadhaar seeding pawh 99.62% zawh a ni tawh.

Amrit Sarovar hnuaiah Lunglei district target 75 chu zawhfel tawh a ni a, kum 2022-23 chhungin MzSRLM hnuaiah SHG 286 siam belh niin, bank account hawn vek tawh a ni. Lunglei district-a PWD Division pathum - PWD Tlabung Division, PWD Lunglei Road Division I leh PWD Lunglei Road Division II hnuaiah PMGSY kawng siam hna 30 zinga 13 zawhfel tawh a ni a, hna 17 thawh leh mek a ni.

PHE hnuaia Swachh Bharat Mission (Gramin)-ah Lunglei district-a thingtlang khua 134 a awm mek a, Lunglei district hian ODF Plus Village ala neih ve loh avangin block tinah Block Coordinator ruat niin, ODF Plus Verification Team pawh din an ni.

Khawpuia miretheite in sak ṭanpuina PMAY (U) hnuaia 1st Phase-ah beneficiary 874 awmin, mi 624 in an sa zo tawh a; 2nd phase-ah beneficiary 637 awmin, 1st instalment pek fel an ni tawh. Tlabungah beneficiary 592 thlan fel niin, 584 in 1st installment an dawng tawh a, 170 in 2nd instalment an dawng fel tawh bawk.

Swachh Bharat Mission (Urban) hnuaiah chhungkaw 1,335-te ek in (individual househoild latrine) sak ṭanpuina pek an ni tawh a, kum upa pension IGNOAPS hnuaiah Lunglei district-ah beneficiary 5,111 an awm mek a, widow pension scheme hnuaiah beneficiary 376 leh pianphung rualbanlo beneficiary 143 an awm mek a ni.

Mid Day Meal hnuaiah sikul 438 aṭangin zirlai 22,951 beneficiary an awm mek a, ICDS hnuaiah Lunglei district-ah anganwadi 418 awm mekin, beneficiary 17,346 an awm. Kum 2022-23 chhungin PMEGP loan 76 (cheng nuai 666.40) pek chuah a ni tawh bawk.