Instagram hmang dik lotu mi pahnih police-in an man

Mizoram police hnuaia Cyber Crime Police Station chuan tunhnai khan Instagram hmang khaw lotu mi pahnih an man.

Cyber PS chuan Aizawla cheng hmeichhe pakhat hnen aṭangin, Insta­gram account pakhat (Ebenezer Z Fanai) inti chuan video bawlhhlawh tak tak a thawn bakah ṭawng­kam mawihnai lo hur­herh tak taka a biak ṭhin chung­changah tun­hnai khan complaint an dawng.

Hetianga a zar buai fo hnuah, a nihna hriat a nih theihna atan hmeichhia hian WhatsApp video call-na tur number dilin he pa hian a pe a ni.

A phone number CDR analysis leh IMEI hmangtea chhui chhuah a harsat avangin an hnu chhui thiamte'n a social media information aṭangtea chhui zui zelin Ebenezer Z Fanai hi Khatla, Aizawl-a private security firm pakhatah a thawk ṭhin tih leh a nihna dik tak chu Vanlalhmingchhuanga (24), Lungtian-II, Lawng­tlai district a ni tih chhui chhuah a ni.

Cyber Crime PS-te hian tualchhung police-te puihnain a mawhphurtu hi Lungtianah an va man a, Aizawla thu an zawhfiah hnuah inpuangin, jail-ah dah a ni.

Tunhnaiah tho khan Cyber Crime PS chuan Zarkawt nu pakhat hnen aṭangin Instagram-ah a fapa hming leh thlalak hmangin mi tuin emaw account siamin Mizorama Myanmar raltlante ṭan­puina tur angin vehbur a khawn thu complaint an dawng a, an thudawn hi an chhuizui nghal.

Complaint thehluha tarlan phone number chu number thi a ni a, a IMEI milpui hmanga chhui chhuah niin, thute zawhfiah a nih hnuah S Malsawmdawngzuala (27), College Veng, Siaha, chu he thila a mawh­phurtu a ni tih chhui chhuah a ni. S Malsawm­dawngzuala hi Siaha-ah man a ni tawh.