Social media hman dan avangin court-in mi 2 a hrem

Delhi-a Mizo nula pakhat thihna chungchang mawi lo taka social media-a tarlangtu pahnih - F Lalhriathlua (22) s/o F Liantluanga, Thuampui, Aizawl leh Lalrinkimi (23) d/o Mangliana, Hunthar Vengte chu court-in kum khat chhung táng tur leh pawisa chawi turin a hrem.

Thu dawn danin, September 12, 2022-a New Delhi-a Lalruatkimi (26) thihna chungchang mawi lo takin social media-ah tarlan a ni a; Lalruatkimi chhungte chuan Aizawl district Chief Judicial Magistrate hnenah criminal complaint an thehlut a ni.

Thubuai thehluh kal zelah F Lalrinhlua (Facebook username Eric Fanai) leh Lalrinkimi (username Rebecca Kimi) te chu police-in December 8, 2022 khan an man a, jail-ah dah luh nghal an ni.

Mi pahnihte hian an thil tihsual chu an pawm a, tun hnuah fimkhur zawka social media an hman tawh tur thu Court an hrilh a; an lakah zahngaihna lantir turin Court an ngen.

Mi pahnihte hi chief judicial magistrate Lalrochami Ralte chuan May 15, 2023 khan thiam loh a chantir a, kum khat chhung táng tur leh Rs 10,000 ve ve chawi turin thutlukna a siam. Pawisa an chawi loh chuan thla nga dang tàn belh turin a ti bawk.