Mizoram Samagra budget vbc. 560.72; P/S zirtirtu mi 2,652 tablet pek a ni dawn
Kum 2023-24 chhunga Samagra Shiksha hmuh tura Project Approval Board (PAB)-in a pawm chu cheng vbc. 560.72 a ni a, kum hmasa aṭangin 49.2%-in a pung. Primary school zirtirtu 2,652 hnenah tablet pek a ni dawn.
Samagra Shiksha hotute hnen aṭanga thu dawn danin, Mizorama zirna tarlanah chenna khaw awm zat atanga sikul hawn zat, gross access ration (GAR) a pung a; GAR hi elementary-ah 95.29, upper primary school-ah 95.2 secondary school-ah 81.96 leh higher secondary school-ah 47.87 a ni.
Samagra hotute tarlan danin, kum 2023-24 chhungin sikul hawn belh zel a ni dawn a, P/S leh M/S inkawp pahnih leh high school pathum hawn belh a ni dawn. Higher secondary school-ah arts zir theihna paruk, science zir theihna pasarih leh commerce zirna pakhat hawn belh a ni dawn.
Arts leh science stream inkawp sikul thar pakhat hawn a ni dawn a, science leh commerce zirna inkawp hmun hnihah hawn thar tum a ni. HSS awm sa sikul pakhatah science zirna hawn tum a ni a, HSS dang pakhatah commerce zirna hawn tum a nih bakah, HS 46-ah vocational education hawn tum a ni.
Primary school zirtirtu 2,652 hnenah zirtirna atana hman ṭangkai tur tablet pek a ni dawn a; pre-primary school 49 hawn belh tum a ni a, Hnahthial leh Khawzawlah DIET hawn thar tum a ni bawk.
2023-24 Samagra Shiksha budget leh hmalakna tur dangte
▶ CSS Hindi teacher-te hlawh tur hmuh a ni.
▶ Elementary school 157 leh secondary school 60-ah ICT facility pek a ni dawn.
▶ Sikul sak ṭhatna tur leh thawm ṭhatna tur hmuh a ni.
▶ Girls hostel pathum leh KGBV building sak ṭhatna tur hmuh a ni.
▶ Residential quarters 10 sakna tur hmuh a ni.
▶ District 10-ah pipe band academy pek a ni dawn.
▶ Aizawl DIET building sak ṭhatna tur leh SCERT building sakna tur hmuh a ni.
▶ HSS science stream tan bilingual textbook (English leh Mizo-a ziah) siam a ni dawn.
▶ Class I-XII zirlaibute braille textbook large print-a siam a ni dawn.
▶ Ziak leh chhiar bulṭhut zirtirna NIPUN Bharat atan Class I-V zirtirna tur hmuh a ni.
▶ RTE Act siamṭhat zulzuiin pawl 3, 5 leh 8 zirlaite thiamna tehna tur neih theih beisei a ni.
▶ Elementary leh secondary tan state level-a assessment neihna tur sum hmuh a ni.
▶ Grassroots Sports Development Centre 40 neih mek bakah, centre dang paruk siam belh a ni dawn.
▶ Block resource centre thawm ṭhatna tur hmuh a ni.
▶ Aspirational district, Mamit district-a sikul 10 tan tinkering laboratory hmuh a ni.
▶ Kum 2022-23 chhunga sum second instalment dawn loh avanga la thawh hman lohte thawhna tur sum hmuh a ni.