CM-in Chapchar Kût Souvenir a tlangzarh

Chief minister Zoramthanga chuan nimin khan CMO conference hall-ah kumin 2023 Chapchar Kût Souvenir - Nghilhloh Bu a tlangzarh a; Chapchar Kût thlirletna review meeting neih nghal a ni.

Zoramthanga chuan, Nghilhloh Bu buatsaihtu editorial board member-te leh thâ thawhtute zawng zawng chungah lawmthu a sawi a, "Mizo hnamin kût kan neihte zingah Chapchar Kût hi a langsar ber leh hnam ziarang kan phochhuahna ṭha tak, state pawn leh ram pawn thlenga ngaihsak a ni," a ti.

Myanmar, Bangladesh leh ram dang a awm Zohnahthlakte pawhin Chapchar Kût chu an hlut tih sawiin Chief Minister chuan, "Hun kal zelah culture pawh zawi zawiin a inthlakdanglam hret hret zel a, chutiang chuan kût kan lawm dan pawh a ṭha zawngin, hmasawn zawngin a danglam zel, " a ti a, kût nuam leh hlimawm tak hman chhoh zel a la nih a beisei thu a sawi.

Kût Souvenir tlangzarhna inkhawm hi IPR director C Lalnunkima'n a kaihruai a; souvenir-ah hian thuziak 13 (Mizo leh English) bakah, report leh kût hmanna thlalak hrang hrang dah a ni.