Kum 10 aia rei hruaitu nih theih lohna dan Cabinet meeting hunah paih ngei se an duh

Mizoram Cooperative Society hotute chuan nimin khan Aizawl Press Club-ah thuthar thehdarhtute kawmin, cooperative society hruaituten kum 10 aia rei hruaitu nihna an chelh theih lohna dan paih ngei se an duh thu an sawi.

He hunah hian Mizoram Apex Bank chairman T Lalmuanpuii chuan, Mizoramah cooperative-in hma a sawn ve zel laiin a inhmang an tlem hle tih sawiin, "Cooperative society hruaituten kum 10 aia rei hruaitu nihna an chelh theih lohna dan hi paih a nih loh chuan hruaitu ṭha neih loh avangin society ṭha sa tam takin a tlakchhiat phah dawn. Chuvangin, he dan hi paih tura ngenna siam kan ni," a ti.

T Lalmuanpuii chuan Cabinet meeting an nei dawn hnai tih sawiin, "Hetah hian kan dan duh loh chu paih ngei se kan duh takzet," a ti a, agenda-ah tel lo mah se, sawi chhuah a nih ngei an beisei thu a sawi.