Sumdawngte'n CYMA an thlawp

Sumdawngte intel­khawmna pawl Mizoram Merchant Association (MIMA) chuan thuchhuah siamin, dan loa sum­dawnna titawp tura Central YMA hmalakna an thlawp thu an tarlang.

MIMA chuan Mizoramah dan loa hnam dang sumdawng an tam hle tih tarlangin, "Heng sumdawngte hian Mizo min la dip ral thuai dawn niin kan hria. Kan mang a ang hle ṭhin a ni. state dangte kan en hian economic assimilation hi kan hlat lo hleah kan ngai a ni," an ti.

An mang a an hle laiin CYMA-in dan loa sumdawngte an dap chhuakin, sumdawnna ti tawp tura hma an la tih tarlangin MIMA chuan, "Mizoram leh hnam hmangaihna tak tak a ni a, a lawmawm kan ti hle. CYMA hmalakna hi MIMA chuan kan thlawp tlat," a ti a, a ṭul ang zela hma an lakna kawngah pawh an theih tawkin an thlawp zel dawn thu a sawi.

MIMA chuan CYMA-in Mizo hming hawha hnamdang sumdawngte leh Mizo, sumdawnna atana hnam dangte hnena an hming hawhtirtute chu April 10 aṭanga chhiara ni 30 chhung hun a pek chu a lo ral ta der tih sawiin, "He an hun tiam ral hnu pawha, CYMA thu pawh zawm duh loa luhlul la chhuah tlattute hi kan dem takzet," a ti.

MIMA chuan Mizo, sumdawnna atana an hming hawhtirtute chu hnam hralhtute an ni tih in hria a, hetiang sumdawnna hi ti tawh lo turin an ngen.