KHAWTHLIR
HSSLC Result
Mizoram Board of School Education (MBSE) chuan May 19, 2023 chhun dar 12 hian HSSLC Examination, 2023 result a tichhuak dawn a; MBSE Office, Chaltlangah leh www.mbse.edu.in emaw www.mbseonline.com ah en theih a ni ang. Result bu hi lei theiha siam a ni a, office hun chhungin whatsapp leh phone call hmangin 9863883041/ 9863722521-ah result hi ngaihven theih a ni dawn bawk.
Zirtirtu training
Mizoram Board of School Education (MBSE) chuan nimin khan an conference hall-ah Aizawl district-a an hnuaia high school leh higher secondary school zirtirtute tan 'Capacity Building of Teachers in Setting Higher Order Thinking Skills (HOTS) Question' tih thupui hmangin ni thum awh tur training an buatsaih ṭan a; National Education Policy (NEP)-2020 chungchang te, Class IX leh X science leh mathematics bilingual textbook te, integrated evaluation scheme (IES) leh application software chungchang inhrilhthar lehna neih nghal a ni.
Remna Ni sawiho
Khawzawl DC K Lalrohlua hoin nimin khan DC conference hall-ah June ni 30, Remna Ni 2023 (vawi 37-na) hman dan tur sawiho a ni a; Zaingen YMA Hall-ah hman ni se, he ni pual hian ‘Cleanliness for Peace and Prosperity’ tih thupui hmangin digital flyer leh short clip video competition buatsaih te, HS leh HSS zirlaite pualin Remna Ni lam hawi quiz competition leh essay competition buatsaih leh Remna Ni pualin thing 37 zel department leh NGO-te phun tirte an rel.
Lehkhabu tlangzarh
Zocareer Solutions founder Lalhruaitluanga lehkhabu ziah 'Zirna Lamtluang (Road Map to Higher Education)' tih chu nimin khan Higher & Technical Education minister Dr R Lalthangliana'n a pisa-ah a tlangzarh. Dr R Lalthangliana chuan, Mizorama zirna hi a chhia a ni hran lo tih sawiin, "Certificate ṭha tak tak nei chhawr tlak loh buaipui ngai tam tak an awm thung. Chuvangin, Mizoram zirna hi ngaihtuah chian a ngai," a ti.
Zote khuaah vawk hralh/ lakluh khap
Champhai district magistrate James Lalrinchhana chuan thupek chhuahin, Champhai district-a Zote khuaah vawk eng emaw zat a thih avangin he khua aṭanga vawk/ vawk sa leh vawk sa aṭanga siam hralh, thawn chhuah leh lakluh a khap. Champhai District Magistrate tarlan danin, thupek hi thla hnih chhung atana chhuah a ni. Zote khua-a vawk thite thisen chu hmunpui lama endik turin an thawn mek.
Councillor-ten tlawh
Lunglei Municipal Council-a councillors thlan tharte chuan nimin khan UDPA Directorate tlawhin officer-te nen an inkawm. UDPA director H Lianzela chuan councillor-te lawmpuina leh lawmna thu sawiin, "Mizoramah ULB pahnihna atan LMC kan nei thei hi a lawmawm," a ti. LMC chairman Lalzuithanga pawhin thu sawiin, zawhna leh chhanna hunte hman a ni.
Jubilee lawm
Chhinga Veng Middle School chuan nimin khan an sikul hall-ah kum 60 (diamond jubilee) an tlin an lawm a, bialtu MLA Robert Romawia Royte, minister of state-in a hmanpui. Minister chuan jubilee lawmpui nan sikul naupangte tan school jersey leh pawisa fai a hlan. Chhinga Veng Middle School hi January 16, 1963-ah din a ni a, zirlai naupang 122 an awm mek.