Ram hmasawnna tur ruahmantu chuan hmathlir thui tak a neih a pawimawh - CM

Multilevel Car Parking & Multipurpose Hall, Govt. Mizo High School, Aizawl chu nimin zing khan hawn a ni a, a hawngtu chief minister Zoramthanga chuan ram hmasawnna tur ruahmantu chuan hmathlir thui tak a neih a pawimawh thu a sawi.

Chief Minister chuan lirthei dahna leh hall ṭha tak mipui hman ṭangkai tura hawn a ni chu lawmawm a tih thu sawiin, "Aizawl khaw din tirh a nih hunlai leh tun dinhmun khai­khinin a hmelhmang te, in awm zat leh lirthei tam dante a inthlau. Tunah chuan khawpui tawt nen tih thawl dan tur kawng hrang hrang dapa ruahman a ṭul ta," a ti.

Sorkarin parking house scheme a siam thu sawiin Zoram­thanga chuan, "PAHOSS-ah mi eng emaw zatin hna an thawh zawh hnuah hripui lengin a hrin sum indaih lohna avangin tum angin hma a lak chak theih loh," a ti a, PAHOSS hnuaia hmalakna chu la tawp loin, ruahmanna siam zel tur a nih thu a sawi.

Chief Minister chuan ram hmasawnna tur ruahmantu chuan ngaihtuahna fing tak nen hmathlir thui tak a neih a pawimawh thu sawiin, "Sum indaih lohna karah theihtawpa hna thawh a ni. Resource mobi­lization committee-te din niin, kan resource neih hrang hrangte mipui hlawkna turin, kan zavai ṭangkaipui tura hmalak dan tur ruahman zel a ni," a ti.

Thusawitu dang, Transport minister TJ Lalnuntluanga chuan, hma­sawnna ruhrel hrang hrang din kawngah sorkarin nasa taka hma a lak tawh dan leh a lak belh zel tur thu a sawi.

Bialtu MLA C Lalmuanpuia pawhin thu sawiin, building hi puitlin a nih theih nan a thâ thawhtu zawng zawng leh ṭawiawmtu zawng zawngte chungah lawmthu a sawi a, "Parking area hian nasa takin a bulhnaia lirthei dahna indaih lohna a chhâwk ngei ka beisei. Court pawh ṭangkai taka hman a nih ngei ka beisei a ni," a ti.

Multilevel Car Parking & Multipurpose Hall, Govt. Mizo High School, Aizawl sak chung­changa mawhphurtua ruat chu Transport department niin, a sak hna hi VINCO Construction in an thawk. A sakna atan cheng nuai 610.06 sèn a ni.

He building hi sq. metres 620 a zau niin, chhawng thum a awm. Basement-ah hian car 15 leh two wheeler 30 a dah theih a, ground floor-ah car 18 leh two wheeler 21 a leng bawk. Third floor chu multipurpose hall atan ruahman niin, badminton court pathum a awm thei a ni.