HSLC top 10-te chawimawina hlan

Mizo Zirlai Pawl (MZP) chuan nimin khan Vanapa Hall-ah Mizoram Board of School Education (MBSE)-in High School Leaving Certificate (HSLC) result a tihchhuah top 10-a Mizo tlingte chawimawina hun Vanapa Hall-ah an buatsaih a, chief minister Zoramthanga'n a hmanpui.

Chief Minister chuan HSLC topper-te chu a lawmpui thu sawiin, tun ṭuma hlawhtlinna an chan chu duhtawk mai loa, zirna sang zawk an zir hunah theihtawp chhuah zui zel turin a fuih a, "Vawiina chawimawina dawngtute leh zirlai dangte pawh theihtawp an chhuah chuan Mizo­ram mai ni lo, India ram pumah pawh a ber thleng phak an ni thei," a ti.

Zu leh ruihhlo chu taksa bakah rilru leh ngaih­tuahna tichhetheitu a nih thu sawiin Chief Minis­ter chuan, "Sang tak thleng thei kha hniam taka dahtu a nih avangin tlansan ngam a ngai a ni," a ti a, zu leh ruihhlo laka fihlim tlat turin zirlaite a chah.

MZP president Lal­nunmawia Pautu pawhin thu sawiin, HSLC a result ṭha tak neih hi hlawh­tlinna a la ni lo tih sawiin, "Hmabak in neihte theih­tawp chhuah­in bei ang che u," tiin zirlaite a fuih.

HSLC 2023 top 10-ah hian mi 17 awmin, chung zinga Mizo zirlai 14-te chu chawimawina hlan an ni a, Rs 5,000 ṭheuh leh lehkhabu pek an ni.