Eirukna laka fihlim ngam tur team ṭha tak Pathianin min pe - Lalduhoma

ZPM chuan nimin khan Pukzing leh Silsury khuaah vantlang inkhawm an buatsaih a, he hun hmanpuitu ZPM leader Lalduhoma, MLA chuan mi nawlpui titiah ZPM an sorkar dawn tih a nih tawh thu a sawi a, eirukna laka fihlim ngam tur team ṭha ZPM-in a neih thu a sawi.

Lalduhoma chuan ZPM chu Zoram People's Movement tih a nih angin, Mizoram chhung mai pawh ni lo, tlang hrang hranga Zo hnahthlak hnam zawng zawng leh a chhunga cheng minorities hrang hrangte a huam tih sawiin, "Tunah hian mipui nawlpui titiah chuan ZPM a sorkar dawn kan ti tawh a ni," a ti.

MNF leh Congress enkawlna hnuaiah hmasawnna hmuh tur a tlem tih sawiin ZPM Leader chuan, "Kan ram ṭhanmawhbawk lian tak eirukna laka fihlim tura intiam CM leh MLA rual kan ram hian a mamawh a, chumi laka fihlim ngam tur hruaitu ṭha leh team ṭha tak Pathianin min pe niin kan hria," a ti a, Pathian lakah a lawm thu a sawi.

Lalduhoma chuan bana kaih policy nena kal kawpin hmasawnna ruhrel lian tak din theih ngei an in beisei tih sawiin, "ZPM hian hna hmasa berah thil pali kan lei dawn a, chungte chu - sawhthing, aieng, hmunphiah leh hmarchate a ni. ZPM chuan a rate kan rawn duang dawn a, mahaldar system hi tihbo kan duh a ni,” a ti.

ZPM Leader chuan, "Mipui rilruah MNF ni lo Congress ni lo sorkar thar siam duhna rilru a lian hle a ni," a ti a, Pathian zara sorkarna an siam thei a nih chuan chuan ramri hrula awmte hmasawnna an ngaih pawimawh dawn thu a sawi.

ZPM thuchhuah tarlan danin ZPM Leader hian an party-ah mi 119 a lawmlut a ni.