Khawlaia ruihhlo ti ṭhinte buaipui turin ruahmanna kan siam dawn - Aizawl SP
Aizawl SP thar Rex Zarzoliana chuan nimin khan a pisaah Mizoram Journalist Association (MJA) member-te kawmin, thingpui a inpui a; khawlaia ruihhlo ti ṭhin buaipui turin ruahmanna siam an tum thu a sawi.
Rex Zarzoliana chuan, ruihhloin khawtlang a luh chilhna leh ruihhlo avanga sualna a tam thu a sawi a, "Hmalak dan tur eng emaw zat kan duang mek a, ruihhlo dona atan sorkar aṭangin pawisa pawh kan hmu tawh. Hmanni lawkah Mizorama a vawi hnihna atan chauha kan la man crystal meth-te kan man," a ti a, Aizawl khawlaia ruihhlo ti ṭhinte buaipui turin ruahmanna siam an tum thu a sawi.
Aizawla dan loa hnam dang awmte zawn chhuah leh patrolling a tam thei ang ber neih an tum thute sawiin Aizawl SP chuan, tunlaiah social media kaltlanga thu belhchian dawl lo leh inhuatna tur awm thei ang deuh thehdarh ching an tam thu a sawi a, "Mipuite mit leh beng hip tura thil kaihlek deuh tuma thil ti an tam tawh em em a, an daisual palh a nih chuan thubuai siam sak theih an ni," a ti.
Aizawl SP sawi danin, tunhnaia Serchhip Bukpui leh Chhiahtlang Chhim Veng inkara ruang pakhat chhar chungchangah tualthattua hnam dang pahnih puhna thlalak post darh a ni a, hei pawh hi a titute chhuizui mek a ni.
Mipuite chu sorkar thuchhuak leh sorkar hriatpui thuthar thehdarhtute thuchhuak ngaichang ṭhin tura a duh thu pawh Rez Zarzoliana chuan a sawi a ni.
He hunah hian MJA General Headquarters vice president Lalremsiama hoin MJA member eng emaw zat an tel a; thawhho leh hmalak dan turte an sawiho a ni.