LMC councillor-te'n Chief Minister an kawm

Chief minister Zoramthanga leh Lunglei Municipal Council (LMC)-a councillor thlan tharte chu nimin khan Chief Ministers' Office-ah an inkawm. Chief Minister chuan, LMC councillor-te chu bulṭan thar tur an nih angin mamawh an neihah inthlahrung lo tur leh a remchan dan ang zela sorkarin a puih tur thu a sawi.

Zoramthanga chuan, councillor-te chu lawmpui thu sawiin, an hmalakhonaah mawhphurhna insem a ṭul thu a sawi a, "A ṭhain mi zawng zawng a daih sen vek loh châng a awm ṭhin a, chungah chuan ngui mai loin mahni koa tla chu ṭhahnemngai taka thawh zel a pawimawh. Hruaitu ṭha ni tur chuan zuitu ṭha nih a pawimawh a, in career atan hre reng ang che u," a ti a; bulṭan thar tur an nih angin mamawh an neihah pawh inthlahrung lo tur leh a remchan dan ang zela sorkarin a puih tur thu a hrilh.

Councillor tharte chu Lunglei leh a chhevel tan hmasawnna ṭha thlentu an nih ngei a beisei thu sawiin Chief Minister chuan, "Sorkar laipuiin inrelbawlna semzai, decentralization a uar zel ang bawkin Mizoramah pawh Aizawlah bulṭanin, tunah Lungleiah Municipal Council din a ni leh a, tunah chuan thil thar vek hmachhawn tur ni mah se inzir chho zelin, mawhphurna tak tak lak hunah chuan hlimawm in tih ngei ka ring," a ti bawk.

Inkawmhonaah hian LMC Councillor-te chuan Chief Minister hnenah hian mamawh an neihte an thlen nghal a ni.