Rengkhasya bialah vote 93.13% a tla

Chakma Autonomous District Council (CADC) inthlanpui, 2023 buatsaiha constituency dang ruala inthlan buatsaih theih lohna Rengkashya MDC Constituency-ah nimin zing dar 7 aṭanga tlai dar 5 thleng vote thlak a ni a, voter 1,411 zinga 1,314 (93.13%) in vote an thlak a ni.

Rengkhasya bialah hian polling station pathum a awm a, vote tlak ṭhatna ber Lukkisury polling station-ah vote 95.24% a tla a, Futsury polling station-ah vote 91.63% tlain vote tlakchhiatna ber a ni. Rengkashya polling station-ah vote 93.20% a tla bawk.

Tarlan tawh angin, CADC hnuaia MDC constituency 20-ah May 9, 2023-ah inthlanpui vote thlak tura ruahman a ni a, hetihlai hian May 4, 2023 khan Rengkhasya biala Bharatiya Janata Party (BJP) official candidate Amit Kumar Chakma chu mi kut tuarin a thi a ni. Hei vang hian SEC chuan Rengkashya biala inthlan hun hi sawn hlain, May 12, 2023 tlai dar 3 thleng BJP tan candidate thar rawtna hun a hawng a, BJP chuan an official candidate atan Sukrity Chakma an ruat a ni.

Rengkhasya bialah hian candidate pathum - Doymoy Daveng Chakma (INC), Prema Ranjan Chakma (MNF) leh Sukrity Chakma (BJP)-te an awm a; vote tlate hi naktuk (May 19, 2023) zing dar 8 aṭangin Chawngte SDO (Civil) Office Complex-ah chhiar a ni ang.