National Education Policy-ah inrawnkhawm

School Education Department buatsaihin nimin khan Mizoram Rural Bank conference hall-ah Consultative Meeting on Implementation of National Education Policy (NEP), 2020 neih a ni a, Education Minister Lalchhandama Ralte-in a hmanpui.

Lalchhandama Ralte chuan NEP 2020 tlangzarh a nih hlim chu Covid-in min tihbuai lai a nih thu sawiin, "A theih ang angin bawhzui nghal a ni. Zirna lama mithiamte awmna group of expert te, task force-te leh study group-te din a ni a, NEP 2020 rawtna bawhzui dan turte an duang a ni," a ti a, rawtna a siam chu thui tak kalpui a nih tawh thu a sawi.

Mizoramah hian kohhran, tlawmngai pawl leh khawtlang hruaitute nena thawhhona a ṭha nia sawiin Education Minister chuan, "Policy mumal tak neia kal zel dawn chuan ṭanho ṭhat zel a ngai dawn a ni. NEP 2020-ah hian mahni hnamzia (nationalism) inzirtir theihna tur kawng a hawng zau viauin a lang . Pathianin Mizote hi hnamah a siam a, he policy tihhlawhtlinnaah hian Mizo hnam nihna hi a laimuah dah sorkarin a ngai pawimawh," a ti.

Education secretary Dr Lalzirmawia Chhangte chuan NEP 2020-in zirna kalpui dan tur a tarlan ṭhenkhat a sawi a, school stage hrang hrangte chu inenkawlna hrang thliaha awm loa kaihkawp a remchan dante leh NEP hian khawsakhonaah lehkha chhiar chu nunphung atana hman tur a nih dante a rawn tarlang.

Inrawnkhawmnaah hian SCERT director Laldawngliani Chawngthu chuan NEP 2020 rawtna tihhlawhtlin tawh leh hmabak pawimawh zualte a sawi.